Prej tre ditësh në mediat lokale dhe ato qendrore, ka shpërthyer çështja “Martini”.Në fillim ka qenë deklarata e Martinit në televizionin lokal por që është “trashur” në një prej gazetave të përditshme. Me qëllim “skupin”, kjo gazetë prej dy ditësh po kërkon të nxjerrë të tjera gjëra në dritë. Sot shkruhej që gjoja një tjetër ish-futbollist i njohur i Vllaznisë ka dalë kundër Martinit duke e quajtur njeri konjuktural.
Por vetë Martini i indinjuar nga gjithë kjo mesele, ka dashur t’i shkojë në fund. Sipas tij, nga kontakti që ka patur me Rragamin, ai i ka pohuar se asgjë nga ato që janë shkruar në gazetë nuk kanë qenë fjalët e tij.Megjithatë Martini duket se don ta vazhdojë luftën. Për të zbardhur të vërtetën siç thotë ai. “Unë nuk e kam sulmuar Shabën se nuk më bëri trajner të Vllaznisë. E kam sulmuar dhe këtë ia kam bërë të ditur prej 3 javësh sepse prej kohësh më ka akuzuar nëpër opinionin sportiv shkodran se në kohën kur kam qenë trajner i Vllaznisë, i kam marrë lekë malazezit Rajoviç për ta mbajtur në skuadër. Këtë e kisha dëgjuar që ua kishte thënë shumëkujt nëpër Shkodër por kur ma ka thënë edhe mua në sy, atëherë vendosa të marr hak. Bisedova edhe me Rajoviçinj, bisedova edhe me Lekon, menaxherin e tij. Asnjëri prej tyre nuk thoshte se unë u kisha kërkuar lekë për të qëndruar në skuadër. Këtë ishin të gatshëm për t’ia thënë në sy edhe Shabës dhe kur desha t’i ballafaqoj, ai mu shmang. Që në atë moment, i kam thënë publikisht se do ta sulmoja për t’i treguar Shkodrës dhe gjithë Shqipërisë se kush asht njeriu që drejton sot Vllazninë”-ka shpjeguar Martini për www.shkodrasport.com
