Egnatia e sezonit 2023-2024 do të kërkojë të konfirmohet si një prej skuadrave më të mira të kampionatit. Fituesja në fuqi e Kupës së Shqipërisë është forcuar edhe më shumë në krahasim me edicionin e kaluar.
Nga merkatoja e verës janë afruar emra si Albano Aleksi, Stivian Janku, Vusal Isgandarli, Edison Ndreca, Alesandro Ahmetaj, Arbenit Xhemajli dhe Ilir Dabjani. Ndërsa mbrojtësi i djathtë kosovar, Loti Celina dhe mesfushori nga Mauritania, Mohamed Lemine, edhe pse nuk janë zyrtarizuar, vijojnë të stërviten me ekipin e parë prej javësh.
Klubi ka investuar këtë sezon për një skuadër që do të kërkojë të fitojë titullin kampion, me presidentin Agim Demrozi që ka plotësuar të gjitha kërkesat e stafit teknik.
Emri më i lakuar për t’u afruar si goditja e fundit në merkato është braziliani i Partizanit, Viktor da Silva, por kjo mbetet për t’u parë në ditët në vijim. Ndërkohë, FSHF-ja ka konfirmuar se edicionin e 85-të të kampionatit do ta hapë me ndeshjen Egnatia-Skënderbeu, të shtunën në orën 17:00 në stadiumin e Rrogozhinës.
Ky është një ogur i mirë për Egnatian, që kërkon të futet në histori këtë sezon duke fituar titullin. Një ëndërr për një qytet të vogël, por që tashmë asgjë nuk është e pamundur.
