Kampionati shqiptar do rikthehet në datën 15 janar. Ekipet e Superligës pas pushimeve që vijonin që nga data 23 dhjetor, sot kanë zbritur në fushë. Skuadra si Vllaznia, Partizani, Teuta, Laçi apo edhe Tirana kanë nisur sot procesin stërvitor për përgatitjet e para të kësaj gjysme të dytë të sezonit.
Të gjitha skuadrat kanë lënë pas periudhën e pushimit dhe po hynë në ritmin e kampionatit. Partizani nga ana e saj ka prezantuar dhe trajnerin me të cilin do vijojë pjesën e mbetur të sezonit. Ai do jetë Dritan Mehmeti, i cili më parë ka qenë pjesë e Partizanit si zëvendës trajner apo trajner i u-21.
Ekipet e kategorisë më të lartë të futbollit tonë do kenë disa përballje interesante që në javën e parë të rikthimit. Ku spikasin disa duele si Tirana – Vllaznia apo edhe Kukësi-Dinamo. Përveç procesit stërvitor, ekipet mendojnë edhe për merkaton.
Disa nga skuadrat kanë bërë lëvizjet e tyre , e ndërsa të tjera po presin për lëvizjet e futbollistëve qoftë në hyrje apo edhe dalje.
/ENDRI ÇINARI/
