Aktualisht trajner i Kombëtares U-19, por Armando Cungu, një ndër trajnerët më të spikatur vitet e fundit, nuk harron që të hedhë vështrimin nga Abissnet Superiore dhe në veçanti nga Vllaznia. Si një njohës i vjetër i futbollit tonë, por në vitet e kaluara edhe në pozicionin e trajnerit, me skuadra të ndryshme, Cungu ka bërë vlerësimin e tij për shkodranët, teksa në prag të ndeshjes Tirana-Vllaznia analizon të dyja skuadrat.
Në një intervistë të dhënë sot për “Shkodra Sport”, ai thekson se shkodranët me kontigjentin qe kanë mund të kishte vend për të bërë më mirë deri në këtë fazë të kampionatit. Cungu thotë edhe se kjo ndeshje nëse shkon keq per kuqeblutë atëherë, kampionati mund të ndërlikohet për ta.
“Me të drejtë quhet klasikja e futbollit shqiptar, për faktin se luajnë dy klubet ose më saktë dy emrat më të mëdhenj të historisë së futbollit shqiptar. Dy ekipe ku në historinë tonë futbollistike kanë rivalizuar fort njëra-tjetren nga ku ndër breza kanë dalë emra të mëdhenj që me talentin e tyre kanë dhuruar spektakël, njëkohësisht duke pasur kontribut të madh dhe për ngjyrat e ekipit kombëtar.
Në ndeshjen që luhet sot shohim dy ekipe në pozicione të ndryshme në klasifikim por që të dy ekipet kanë objektiva të njëjtë, titullin kampion, për vetë emrat dhe historinë që mbartin, por edhe me mundësitë që kanë, pasi nuk shoh se ka ekip të pathyeshëm dhe që bën diferencë me ekipet tjera.
Në fakt ka një distancë prej 8 pikësh nga ekipi kryesues Tirana dhe duke parë që kanë mbetur edhe 3 javë për t’u mbyllur faza e dytë ose gjysma e kampionatit, më duket distancë e konsiderushme dhe shkëputje që nuk duhej të ishte prej 8 pikësh dhe pozicionim në vendin e katërt.
Kjo pasi Vllaznia me kontigjentin dhe blerjet e bëra që rreth 16 lojtarësh që është e konsiderushme mendoj se kërkohej diçka më tepër nga Vllaznia, si në lojë ashtu dhe rezultate. Kjo ndeshje i duhet patjetër Vllaznisë për t’u afruar dhe për të qenë afër kryesimit, në të kundërt gjërat bëhen dhe më të vështira dhe të ndërlikuara Vllaznisë.
Uroj që stadiumi sot të jetë i mbushur nga tifozat shkodranë, të cilët gjej rastin t’i përshëndes fort, të shohim një ndeshje të bukur, me ritëm dhe emocione për të përligjur emrin e klasikes dhe të fitojnë më i miri që uroj të jetë Vllaznia”,-shprehet Cungu.
Trajneri 48-vjecar flet edhe për ekipet rivale të shkodranëve, teksa thekson se nuk shikon ekip të favorizuar, por shprehet se katër ekipet e para do jenë deri në fund në lojë për kampionatin.
“Mos harrojmë se para Vllaznisë ndodhet edhe Kukësi dhe Laçi që janë ekipe të konsoliduara dhe kanë shfaqur futboll dhe ambicie të mëdha që nuk do rrijnë duarkryq për të parë, por do kërkojnë të përfitojnë nga çdo gabim i rivalëve.
Nuk shoh ekip të favorizuar pasi ekipet janë të gjithë aty-aty pa shumë diferenca. I vetmi favorizim mund të jetë fusha. Tabela flet vetë, janë pikërisht katër ekipet e para që do luftojnë për kampionat. Ne po analizojmë atë ç’ka kemi parë deri në këto momente që flasim, ku Vllaznia nuk e ka treguar, gjthsesi ka shumë ndeshje deri në përfundim të kampionatit”,-thotë tekniku shkodran.
Në fund, kur pyetet për titullin kampion, Cungu nuk e fsheh, por shpreson që fituesja e kampionatit të jetë skuadra e tij e zemrës, Vllaznia.
“Uroj dhe shpresoj që pjesën e mbetur të jetë Vllaznia dominuese dhe fituesja e kampionatit, por cdo gjë mund të ndodhë, përveç Tiranës, Kukësi ka treguar futboll të bukur dhe koncept në lojen e saj, fut këtu edhe faktin që pas shumë vitesh kthehet në stadiumin e saj dhe prania e tifozëve do jetë shtysë plus për Kukësin. Javët e fundit kanë treguar që Laçi është ekipi më në formë dhe besoj se do e kërkojnë deri në fund titullin kampion”,-mbylli trajneri shkodran Armando Cungu.
Maringlen ZHIVANI
