Klubi i Vllaznisë është në një eksod të madh, pasi në ditët e fundit janë larguar më shumë se gjysma e skuadrës. Kështu, duke filluar që nga kapiteni Gurishta dhe deri te sulmuesi Kaina, shkodranët kanë humbur futbollistët kryesorë të sezonit të shkuar.
Së fundmi, as Darko Bulatoviç nuk do të jetë më pjesë e Vllaznisë. “Shkodra Sport” ka mësuar nga burime zyrtare në klubin shkodran se me mbrojtësin malazez nuk do të rinovohet kontrata. Drejtuesit nuk e kanë parë të arsyeshme t’i ofrojnë rinovim kontrate.
Palët janë ndarë pas një bisede që kanë pasur gjatë ditës së sotme, me Bulatoviç që ka dorëzuar edhe bazën e tij materiale në klub.
Pak ditë më parë, Vllaznia njoftoi edhe largimin e Liridon Latifit dhe Dajan Shehit.
Ndërkohë që, edhe kapiteni Erdenis Gurishta dhe Ardit Hoxhaj kanë njoftuar largimin, teksa edhe Fjoart Jonuzi dhe Arsid Kruja janë të tjerë futbollistë pa kontrata.
Maringlen ZHIVANI
