Një Hansi Flick i ekstazuar iu drejtua medieve në një konferencë për shtypin pas fitores vendimtare të Barcelonës ndaj Sevilla-s. Pavarësisht incidenteve që ndodhën gjatë ndeshjes, si përjashtimi i Fermín López dhe dëmtimi i Ronald Araujos, gjermani tha: “Jam shumë i lumtur me paraqitjen tonë. Luajtëm mirë dhe luftuam për tri pikët.”
“Mendoj se luajtëm mirë në pjesën e parë, edhe Sevilla luajti mirë, natyrisht. Në pjesën e dytë, ndryshuam disa gjëra të vogla. Luajtëm me më shumë ritëm, më shpejt, dhe kombinimi 1-2 i Fermín-it ishte shumë i rëndësishëm për ne. Jam shumë krenar për ekipin. Pas kartonit të kuq, u mbrojtëm shumë mirë me skemën 4-4-1,” vlerësoi gjermani.
Barcelona, skuadra më e mirë në La Liga?
Fitorja në Nervión ka bërë të qartë se nuk ka ekip më të mirë në La Liga sesa Barça. Në këtë drejtim, Flick deklaroi: “Ka tri, katër ose pesë ekipe shumë të mira dhe ne jemi mes tyre. Kemi stilin tonë dhe jemi të fokusuar tek ai. Sot jam i lumtur për tri pikët që fituam në Sevilje, por në fund është një rrugë e gjatë.
Jemi në një situatë të mirë. Nuk shqetësohemi për të tjerët. Duhet të bëjmë punën tonë dhe sot e bëmë. Jemi të fokusuar te vetja dhe jo tek ekipet e tjera,” shtoi trajneri.
Përjashtimi i Fermín López dhe dëmtimi i Araujos
Flick dëshironte të vlerësonte paraqitjen e ekipit pas përjashtimit të Fermín López. “Fermín ishte i trishtuar për përjashtimin, ai kishte shënuar një gol të rëndësishëm. Jam i kënaqur me intensitetin e tij (dhe të Gavi-t). Kjo ndodhi sot dhe duhet ta pranojmë,” komentoi ai.
“Këto gjëra ndodhin, është një mësim i mirë të luajmë me skemën 4-4-1 dhe të dimë si të mbrohemi në këtë mënyrë. Është ndryshe të luash me 10 lojtarë dhe ne e bëmë shumë mirë. Ata kanë anësorë të shkëlqyer dhe arritëm të mbroheshim shumë mirë,” shtoi gjermani.
Trajneri gjithashtu dha një mesazh qetësues për tifozët e Barcelonës në lidhje me dëmtimin e Ronald Araujos, i cili u detyrua të linte fushën në “Ramón Sánchez-Pizjuán” pas një ndërhyrjeje të ashpër nga Saúl Ñíguez. “Duhet të presim deri nesër, por mendoj se dëmtimi i Araujos nuk është serioz,” deklaroi Flick.
Pedri, Ansu Fati dhe shpërblimi për ekipin
Flick vlerësoi Pedrin si “monumental”, pasi ai drejtoi ekipin nga mesfusha dhe dha një tjetër asist. “Ai është i pabesueshëm. Është i mirë me topin, i shpejtë, na ndihmon shumë në zotërimin e topit për të dalë nga presioni… Është i madh dhe jam shumë i kënaqur me mënyrën se si luajti sot,” theksoi ai.
Nga ana tjetër, ai foli për situatën e Ansu Fati-t, i cili nuk u përfshi në listën e skuadrës për ndeshjen e së dielës. “Kam qenë i sinqertë me të. Kam folur me të. Në një ditë, jo gjithçka është perfekte, por ai është pranë ekipit. Kjo është e rëndësishme. E kam parë në nivelin më të lartë dhe ky është niveli që dua të ketë. Nuk është një rrugë e lehtë, por ai po i afrohet rikthimit në ekip,” tha Flick.
Në fund, trajneri blaugrana zbuloi se, pas fitores së madhe ndaj Sevillas, u kishte dhënë lojtarëve “tri ditë pushim, që të pushojnë, sepse besoj se e meritojnë. E rëndësishme është që të mos bëjnë budallallëqe dhe të fokusohen te rikuperimi,” përfundoi ai mes të qeshurave në sallën e konferencave.
