Elis Legata një prej trajnerëve që punon prej vitesh me moshat apo futbollin e femrave në Shkodër ishte pjesë e rubrikës Star Sport mbrëmë. Ish-trajneri i portierëve edhe tek Vllaznia foli për kampionatin shqiptar dhe kuqeblutë në veçanti.
Legata tha:”Vllaznia ka pasur një super ecuri në këto ndeshjet e fundit. Më pëlqen fakti se ekipi ka një “plan B” ose më mirë ta themi se skuadra di të interpretojë lojën në mënyra të ndryshme. Jo vetëm të sulmojë pafundësisht, por edhe të jetë cinike dhe racionale në raste të caktuara.
Patjetër stili sulmues i Vllaznisë bën që të lihen hapësira në mbrojtje dhe skuadra rrezikon të pësojë gol, por mbrojtja ka treguar nivelin e duhur në ndeshjet e fundit.
Besoj se skuadra do vijojë të ecë kështu pasi ka gjetur ritmin e duhur. Mendoj se edhe me Dinamon do jetë një ndeshje ku kuqeblutë do fitojnë, kjo duke parë edhe krizën që po kalojnë dinamovitët.”
Endri ÇINARI
