Sporti i mundjes në Shkodër na ka dhuruar shumë emra kampionësh të cilët kanë shkruar historinë e këtij sporti. Mes tyre ka edhe trajnerë që kanë lënë gjurmë me veprimtarinë e tyre. Një ndër to është edhe Eljaz Ahmeti, një trajner i cili ka drejtuar ekipin e Vllaznisë me shumë sukses në vitet ’70-’80.
Eljaz Ahmeti ka lindur në Bajzë të Kastratit më 14 qershor të vitit 1939. Shkollën shtatëvjeçare e mbaron në vendlindje, të mesmen në Tiranë dhe shkon në Institutin e Fiskulturës përsëri në Tiranë, degë të cilën e mbaron me rezultate të shkëlqyera.
Në vitin 1977 mbaron edhe Universitetin e Shkodrës “Luigj Gurakuqi”, dega Histori-Gjeografi. Sipas ligjit të kohës kryen shërbimin ushtarak trevjeçar në Durrës. Aty spikat si talent i sportit burrëror në sportin e mundjes klasike. Vjen i përgatitur nga vendlindja si talent në të gjitha sportet ku kishte ushtruar si në futboll ashtu edhe në atletike, si në hedhje gjylje, tërheqje litari dhe shumë sporte të tjera që aplikoheshin në atë periudhë në Spartakiadat e Koperativave Bujqësore ku ky kollos gjithmonë zinte vendin e parë dhe merr tituj nderi.
Spikat në mundjes klasike ku dallohet dhe fiton kupën e Spartakiadas në ushtri, bëri që të tërheqë vëmendjen e specialistëve të sportit burrëror të mundjes. Siç ndodhte zakonisht me talente të tilla, Eljazi përzgjidhet nga specialistët e ekipit të Partizanit dhe ftohet në Tiranë ku bëhet shpejt anëtar i ekipit të Partizanit.
Aty mbaron edhe shërbimin ushtarak të detyrueshëm trevjeçar. Mbas mbarimit te tij në vitin 1961, u mbajt si nënoficer në ushtri, por me qëllimin e vetëm të merrej vetëm me sportin burrëror të mundjes ku ky ishte kampion absolut në shkalle Republike. Kjo ka ndodhur me urdhër të ministrit të mbrojtes të asaj kohe Beqir Balluku, i cili nuk e lejon largimin nga Partizani që në atë kohë përfaqësonte Ushtrinë Popullore të Republikës së Shqipërisë.
Gjatë kësaj periudhe, ka qenë kampion i Shqipërisë në vitet 1961-1968, pra për 8 vjet me rradhë. Gjithmonë merr pjesë me ekipin kombëtar në peshat 73 kg, 82 kg dhe mbi 90 kg që është pesha e super e rëndë. Me ekipin kombëtar bën ndeshje kundër Hungarisë, Polonisë, Bullgarisë, Turqisë dhe Bashkimit Sovjetik.
Pas lënies së sportit, fillon karrierën si trajner me të rinjtë e Partizanit por ai nuk mund të qëndronte më larg Shkodrës dhe Vllaznisë. Kthehet dhe merr drejtimin e ekipit të mundjes së lirë të Vllaznisë të cilin e drejton nga viti 1973 deri më 1990.
17 vjet trajner, duke dhuruar suksesshme të njëpasnjëshme. Nën drejtimin e tij, ky ekip ka marrë plot 14 trofe dhe pikërisht 7 tituj kampion, 6 Kupa Republike si dhe finalet e Spartakiadës Kombëtare të vitit 1984. Nga duart e Eljaz Ahmetit kanë dalë 42 sportistë që janë shpallur kampionë kombëtarë, kanë dalë 12 Mjeshtra Sporti dhe 6 Mjeshtra të Merituar Sporti.
Emrat flasin vetë, duke filluar nga kampioni i parë i mundjes së lirë Tasim Rexha, për të vazhduar me Dedë Bregun, Rrok Bardelin, Tonin Demën, Agustin Mhillin, Luigj Zefin, Isa Vejukën, Hysen Vejukën, Fran Topallin, Alfred Bardelin, Artur Sukajn, Ludovik Vatën, Kolec Lisin, Selaundin Rexhën etj.
Sot gëzon titullin Mjeshtër Sport, Mjeshter i merituar i Sportit, Nderi i sportit shqiptar, Nderi i Federates se Mundjes, ka marr çmimin Sportiv te qytetit të Shkodrës “Palok Nika”, çmimin “Mirënjohja e Qytetit” të Shkodres. Sot ne moshen 79 vjecare gezon shendet te plote dhe respektin dhe mirnjohjen e gjithe Shkodres.
Gjergj KOLA
