Në kohët e hershme, në Shqipëri, fati i njerëzve përcaktohej që në djep, pasi martesat e fëmijëve bëheshin kur ata akoma nuk kishin lëshuar zërin e parë, një fatalitet shqiptarësh.
Në historitë moderne nuk mungojnë përcaktimet e jetës që në moshë të njomë, rasti më tipik është ai i Elseid Hysajt. Elsi, siç e njohin në Shkodër, që në hapat e fëmijërisë së tij kishte dy mundësi: futbollin, ose futbollin!
Nuk kishte zgjidhje të mesme për të, as devijime majtas apo djathtas, një top në këmbë të “imponuar” nga babi i tij, Gëzimi, dhe punë.
Hapat e parë të futbollit i hodhi në qytetin e tij, aty ku është vendi ideal për t’u dashuruar me sferën e magjike. Për fat të mirë, fushën e kishte 5 minuta larg shtëpisë.
Djaloshi i imët shkonte shpeshherë vetëm dhe shihte ekipet më të mëdha duke luajtur futboll me dëshirën për të qenë si ata kur të rritej.
Babai i tij dirigjoi nisjen e karrierës, pasi e regjistroi në klubin e futbollit “KF Shkodra”. Trajner ishte Taip Piraniqi, në qytetin verior njihet për përkushtimin dhe seriozitetin në punën e tij.
Stërvitja zhvillohej në kompleksin sportiv “Zmijani”, i cili ka si pronar Hysen, një ndër ish-lojtarët më të talentuar të Shqipërisë. Ky i fundit është një ndër mbrojtësit më të mirë në krahun e djathtë që ka nxjerrë Shqipëria, ashtu si Hysaj. Dikush mund të mendojë se është një rastësi e bukur, por të tjerë mund të betohen se gjërat janë të përcaktuara që në start.
Në moshë të re, Elsi nuk luante si mbrojtës, por si shkatërrues përpara këtij reparti. Kur ekipi ishte në humbje, trajneri e nxirrte edhe në sulm. Arsyeja? E thjeshtë, ai ishte më i zhvilluar se të gjithë futbollistët e tjerë të moshës së tij, pasi kishte lëshuar trup herët dhe ishte i fortë fizikisht.
Një ndër tiparet që të bënte të besoje fort në të ardhmen e tij ishte sedra. “Mbaj mend një ndeshje, ekipi ynë humbi me Veleçikun. Unë i fola Hysajt, ndërsa ai u largua duke qarë nga dhomat e zhveshjes. Kishte një sedër të jashtëzakonshme”, – shprehej ish-trajneri i tij, Taip Piraniqi, për të.
Elsi luajti deri 14 vjeç në Shqipëri, më pas u zhvendos në Itali. Gëzimi u fut sërish në “aksion”. Fillimisht, mbrojtësi u pranua te Akademia e Fiorentinas. Qëndroi pak kohë aty për të mësuar futbollin italian dhe më pas kaloi te Akademia e Empolit.
Aty ku mori rrugë edhe historia e tij. Ftesë me Kombëtaren e moshave të Shqipërisë dhe interes maksimal nga ekipi italian. “Ishim me Kombëtaren në një turne në Itali, kishim marrë edhe Hysajn. Kishte një problem në këmbë.
Doktori i Empolit më ka marrë 2-3 herë në telefon të më sqaronte situatën e tij. Aty e kuptova, ky lojtar do të bëhej i madh”, – më tregoi personalisht një mik i mirë që punonte në FSHF atë periudhë.
Nuk e kishte gabim, pasi pak muaj më vonë, Hysaj debutoi me ekipin e Empol-it për të mos u ndaluar më. Më 24 nëntor të vitit 2011, ai luajti ndeshjen e parë si profesionist në Itali. Empoli udhëtonte në Firenze për të luajtur kundër Fiorentinas në një ndeshje kupe. 90-minuta për në humbjen 2-1, ishte 17-vjeç.
Në sezonin e ri, 18-vjeçari u bë titullar fiks te skuadra e Empolit duke luajtur rregullisht me ekipin e tij dhe nisi të zgjonte interesin e shumë klubeve. “Qershia mbi tortë” do të ishte debutimi me Kombëtaren shqiptare, 18-vjeçari u grumbullua nga Gianni De Biasi dhe luajti në miqësoren kundër Gjeorgjisë (0-0) më 15 nëntor 2013.
Mbajeni mend këtë datë, pasi është dita kur Hysaj u bë futbollisti i tretë më i ri që provoi fanellën kuqezi.
Në Itali, fati i tij u lidh me trajnerin Maurizio Sarri, histori suksesi te Empoli, ndërsa ky i fundit e tërhoqi edhe te Napoli duke e pasur beniamin e tij.
Dyshja kërkon të kapë legjendën e këtij qyteti, Maradonën, pasi kryesojnë Seria A-në dhe po synojnë titullin kampion. Me Shqipërinë ka provuar emocione të forta, pasi ishte pjesë e “Euro 2016”. Ai është lideri i ri i ekipit tonë, kapiteni i ardhshëm me shumë mundësi!
Elsi është futur në orbitën e shumë klubeve të njohura, pasi zërat e merkatos e kanë lidhur me klube shumë të mëdha të Europës, ku i dihet, mbase mund ta shohim duke na përfaqësuar edhe me fanella shumë të rëndësishme, po kryqëzojmë gishtat.
Çfarë histori frymëzimi miq, nga një emigrant në komandant të Napolit. “Këtu komandoj unë, të thashë që këtu komandoj unë”, – u shfaq Hysaj duke i thënë me shaka, një fëmije që ishte futur në dhomat e zhveshjes.
Hysaj feston datëlindjen sot. Mosha e tij është e pabesueshme, pasi fryn vetëm 24 qirinj dhe ka 7 vite si lojtarë profesionist. 41 ndeshje me ekipet e Shqipërisë së moshave nga U-17 e deri te Kombëtarja e madhe, 22 ndeshje në Europë me Napolin, 13 ndeshje në Kupën e Italisë me Empolin dhe skuadrën aktuale dhe 193 ndeshje të ndara në mes të Seria A dhe B-së. Çfarë frymëzimi, u bëfsh 100 vjeç kampion! /EDS/
