Te Vllaznia vijon puna për ndërtimin e skuadrës për sezonin e ri. Drejtuesit e klubit shkodran kanë vijuar edhe dje takimet me lojtarët me të cilët kanë ndër mend që t’i kenë pjesë të formacionit të tyre. Nga sa mësohet, dje drejtuesit e klubit kanë zhvilluar një takim me shkodranin Elvin Beqiri. Ish-lojtari i Kombëtares, i cili prej disa ditësh ndodhet për pushime pranë familjes së tij në Shkodër, dje ka marrë edhe ofertën zyrtare nga ana e drejtuesve më të lartë të klubit. Një ofertë, shuma e së cilës ende nuk dihet, por që mbrojtësi do ta shqyrtojë dhe do të japë përgjigje brenda pak ditësh. “Kam pasur kontakte me drejtuesit e klubit sot (dje) dhe kemi folur për mundësinë e kalimit tim pranë Vllaznisë. Natyrisht që e kam mirëpritur një ofertë të tillë nga ana e drejtuesve të klubit, por që të jem i sinqertë, jam në pritje të ndonjë oferte që mund të më vijë nga Azerbajxhani.
Unë erdha dhe këto ditë kam lëvizur përsëri në Azerbajxhan, ku kam pasur oferta konkrete. Megjithatë, pa ndonjë konkludim konkret. Natyrisht që të kthehem te Vllaznia pranë familjes sime nuk do të ishte keq, madje e shikoj me nota shumë pozitive, megjithëse pa marrë një përgjigje definitive prej Azerbajxhanit nuk do t’u kthej një përgjigje drejtuesve të klubit”, – është shprehur fillimisht Beqiri.
Përgjigjja Por, ajo që mësohet është se shkodrani do t’u kthejë shumë shpejt, ndoshta që javën tjetër, një përgjigje drejtuesve të klubit shkodran. Ai nuk kërkon të qëndrojë shumë larg stërvitjes dhe për këtë pritet t’i thotë “po” alternativës shkodrane. “Them se shumë shpejt do t’u kthej një përgjigje drejtuesve të klubit, pasi e ka pohuar se kërkoj që shumë shpejt të gjej ekipin tim për sezonin e ri. Kjo, pasi nuk dua që të humb shumë kohë nga përgatitja ime. Shumë shpejt besoj se do të kthej edhe përgjigjen dhe i falënderoj për ofertën e tyre. Pranë familjes dhe Vllaznisë ndihem mirë ndaj, nëse këto ditë nuk do të kem përgjigje nga ndonjë klub nga Azerbajxhani apo ndonjë shtet tjetër aty ku menaxherët e mi janë në kontakte, atëherë zgjedhja ime natyrisht që do të jetë Vllaznia”, – përfundon Beqiri.
Drejtuesit Drejtuesit e klubit e kanë ulur disi ritmin e punës së tyre për sa u përket zhvillimit të bisedimeve me lojtarët që kërkojnë për sezonin e ri. Nga sa mësohet, ata tashmë janë në periudhën e pritjes së përgjigjeve nga lojtarë të ndryshëm. Kryesisht pritet një përgjigje përfundimtare si nga Duro ashtu dhe Osmani, por edhe nga Dragoi dhe Nikolla Vukçeviçi. Gjithashtu, drejtuesit e klubit shprehen se presin edhe një rrugëzgjidhje nga ana e drejtuesve të klubit të Tiranës, për sa i përket sulmuesit Bala.
Admir Uruçi
