Elvin Beqiri e sheh të denjë Vllazninë e tij për në Europë. Edhe pse kuqeblutë janë ende larg vendit të tretë, kapiteni beson se ekzistojnë shanse reale për të marrë pjesë në Kupat e Europës. Një gjë të tillë ai e ka shprehur në një intervistë për gazeten, ku ka treguar edhe çelësin e suksesit të kësaj Vllaznie. Beqiri e ka vënë theksin edhe tek puna që tekniku Bushati ka bërë me skuadrën dhe, sipas tij, ndryshimi që nga fundi i vitit të shkuar nuk është në emra, por në mentalitetin që ka përcjellë vetë tekniku dhe drejtuesit e rinj. Sa i përket takimit ndaj Laçit, ai do të kthehet në pozicionin e tij të preferuar, atë të qendërmbrojtësit.
A e kishit menduar qysh në këtë start të pjesës së dytë të sezonit këtë ngjitje të Vllaznisë?
Të jem i sinqertë, nuk më kishte shkuar në mendje një nisje e tillë për vetë faktin se ne nuk kishim shumë ndryshime në përbërje. Por të them të drejtën nisja e kësaj faze ka qenë më e mira. Skuadra arriti një fitore në Korçë, e cila rriti më tepër moralin. Për mendimin tim, kjo është nisja më e mirë e mundshme, pavarësisht se mund të kishim marrë edhe ndonjë pikë në takimin me Luftëtarin.
Çfarë ndryshoi te kjo Vllazni?
Natyrisht, ndryshimet nuk ishin në emra, por në mentalitet dhe në besimin që u krijua në skuadër. Merita më e madhe i takon teknikut Bushati që solli një tjetër mentalitet te ne dhe na bëri që të rrisim besimin takim pas takimi. Nuk diskutohet që ndryshimi i Vllaznisë është i dukshëm. Ai që e ka parë Vllazninë nga faza e parë e bën vetë dallimin.
Mendoni se me këto ritme Vllaznia është e denjë për të qenë në Europë?
Për mendimin tim them se po. Nëse do të vijohet me të tilla lojëra dhe rezultate, nuk do të vihet në dyshim një gjë e tillë. Megjithatë unë mund them se gjërat duhet të bëhen në kohën dhe në momentin e duhur. Nuk duhet të shikojmë larg, pa parë fillimisht ndeshjen e radhës.
Duke u kthyer tek ai, si e shikon Beqiri përballjen me Laçin?
Nuk ka përballje të lehtë. Për mendimin tim, është një nga përballjet më të vështira që, deri tani të paktën, do të kemi në transfertë. Laçi është një skuadër e fortë dhe me lojtarë të mirë në përbërje. Për më tepër që është i fortë në fushën e vet. Për mua, nuk do ta kemi aspak të lehtë të kërkojmë atë që dëshirojmë.
Do pranonit edhe një barazim me këtë logjikë?
Në çdo takim do të shkojmë për të marrë maksimumin. Por, në transfertë edhe barazimi mund të themi se është pozitiv. Sidoqoftë, ne do të kërkojmë në çdo takim të marrim pikët maksimale.
Së fundmi, Beqiri do të kthehet në këtë takim në rolin e tij të zakonshëm, apo do të jetë ku ka nevojë skuadra?
Për mua ka shumë rëndësi që të jap maksimumin aty ku më kërkohet të luaj. Natyrisht, kam kohë që luaj në qendër dhe një rikthim në vendin tim është shumë pozitiv për mua, por them të jetë i tillë edhe për skuadrën
Admir Uruçi
