Kupa e Mbretit duket se është turneu i preferuar për sulmuesin e Real Madrid, Endrick. Ai nuk ka shënuar vetëm në ndeshjen e parë kundër Deportiva Minera, pas së cilës shpërtheu talenti i ri brazilian: 5 gola në 5 ndeshje të luajtura.
Mbrëmë nënshkroi barazimin e përkohshëm 1-1 në ndeshjen e kthimit të gjysmëfinales ndaj Real Sociedad, që kualifikoi “los blancos” në finale. Kështu, Endrick barazohet me Julian Alvarez si golashënuesi më i mirë i Kupës.
“Dua të shënoj dhe të fitoj trofe. Më pëlqen kur tifozët festojnë. Ne do të stërvitemi fort për të fituar këtë trofe. Unë jam këtu për të ndihmuar, për të shënuar gola dhe për të mbrojtur”, tha 18-vjeçari brazilian.
“Tani duam të shkojmë edhe në një finale tjetër, atë të Champions League. Goli im? Në fillim mendova se do të gjuaja fort, por pashë që portieri kishte dalë dhe e kuptova se çfarë duhej të bëja”, shtoi Endrick.
Pavarësisht thashethemeve të ndryshme për të ardhmen e tij, ai tha: “Duhet të shfrytëzoj në maksimum çdo minutë që luaj. Këtu luajnë kampionë si Vinicius, Rodrygo, Jude dhe Mbappe… katër sulmuesit më të mirë në botë”.
“Unë jam askushi para tyre. Jam këtu si një mik për të gjithë, si një lojtar që dëshiron të punojë për të qenë këtu gjithë jetën e tij. Nuk më intereson kush do të luajë. Edhe kur jam në stol dua të mbështes ekipin tim, nëse aktivizohem jap gjithçka”, tha Endrick./telesport/
