Vllaznia fitoi 3-2 sot kundër Kamzës, ndeshjen e vlefshme për javën e 15-të të Superligës. Shkodranët iu shkëputën disi “zonës së ftohtë”, por siç e pranon edhe vetë sulmuesi Erald Çinari në një intervistë për “Vipsport.al”, rreziku ende nuk ka kaluar. Autori i golit të dytë për Vllazninë në takimin kundër Kamzës, shprehet se kjo fitore erdhi në momentin e duhur. Ndërsa për Çinarin, ky ishte goli i parë për të, në këtë sezon në Superligë.
-Si ndiheni pas kësaj fitoreje, jeni më të çliruar?
-Normale që pas çdo fitoreje ndihesh mirë. Ishte një sukses i bukur, sidomos pjesa e dytë e takimit kishte rritëm të lartë. Kundërshtari na e vështirësoi shumë lojën, por në fund ia arritëm qëllimit që të dilnim me tri pikët. Kemi punuar dhe jemi angazhuar në maksimum, sepse na duhej kjo fitore, me çdo kusht. Jemi të gëzuar pas triumfit ndaj Kamzës, por ende nuk jemi të çliruar, sepse nuk i jemi larguar shumë zonës së rrezikut. Kemi ende shumë punë përpara.
-A ndikoi ndopak ai presioni që u krijua para ndeshjes në lidhje me kërcënimet që kishte marrë trajneri? Si u përjetua ai moment në skuadër gjatë ditës së djeshme duke qenë se e pranishme ishte edhe policia në stërvitje?
-S’kishe fare presion dhe asnjë moment të tillë. Ne ishim të përqendruar te ndeshja. Nuk e dinim fare se për çfarë kishte ardhur policia dhe s’jam unë ai që duhet të flas për këtë pjesë…
–Po në aspektin personal, sa i rëndësishëm ishte goli i sotëm?
-Ishte shumë i rëndësishëm. Më mungonte goli, sepse paraqitjet e mira nuk kan munguar. Por mungonte “qershia mbi tortë” dhe më në fund erdhi, sepse po e kërkoja prej kohësh. Ishte një gol çlirimi dhe shpresoj të ketë edhe të tjerë nga ana ime në vazhdim. Gjithmonë goli të liron në aspektin psikologjik, je më i qetë.
-Kujt ia dedikoni golin?
– Në fakt dua t’ia dedikoj djalit të xhaxhait tim, Sajmir Çinarit, i cili para dy muajsh ka bërë një operacion dhe ky gol shkon për të.
-Për sa i përket merkatos, emri juaj është përmendur si një alternativë për sulmin e Partizanit…
-Nuk më pëlqen të flas për këtë pjesë në këto moment. Dua të mbarojë njëherë dhe kjo ndeshje e radhës që kemi kundër Partizanit, të marrim maksimumin në Tiranë dhe më pas t’ia lëmë kohës.
-Si e shihni ndeshjen e radhës kundër Partizanit, çfarë pret Vllaznia nga ky 90-minutësh?
-Ndeshjet kundër pretendentëve shihen me sy tjetër dhe me një impenjim më të madh. E respektoj Partizanin, por ne do shkojmë të bëjmë lojën tonë, sepse na nevojiten tri pikët.
Edhe Partizani do kërkojë fitoren, ndaj mendoj se do të jetë një ndeshje e gjitha për t’u shijuar. Do jetë një takim i luftuar. Ajo skuadër që do të bëjë më pak gabime do të marrë tri pikët.
-Sa shanse ka Vllaznia që të mos përsëritë sezonin e shkuar kur e siguroi mbijetesën në ndeshjen e fundit të sezonit?
-Besoj që i kemi të gjitha shanset që ta shmangim një gjë të tillë, sepse me paraqitjet që kemi bërë, mendoj se nuk e meritojmë atë vend ku jemi në renditje. Por iu kemi dhuruar golat kundërshtarëve, çka na ka dëmtuar. Futbolli është lojë gabimesh dhe kjo na ka penalizuar pak me thënë të drejtën. Nuk besoj se do të përsëritet sezoni i kaluar. Po punojmë fort dita-ditës me një staf shumë profesionist që po bëjnë maksimumin e tyre dhe kjo shihet qartë, pasi ka pasur një ndikim të madh te ne. Po rritemi nga ndeshja në ndeshje.
