Për të dytin sezon me rradhë po luan rolin e liderit tek “Vllaznia B”. Po e bën në mënyrën e duhur, shembull në fushën e lojës, në stërvitje dhe kudo tjetër. Ergi Borshi ndonëse stërvitet me ekipin e parë, nuk ka gjetur hapësirën e duhur për të luajtur aty dhe për rrjedhojë, nuk ka hezituar për asnjë moment që të kalojë tek ekipi i dytë.
Trajnerët Kraja e Xhahysa nuk kanë nevojë t’i bien fare telefonit për ta lajmëruar për ndeshje sepse Borshi tregohet vërtetë profesionist dhe është gjithnjë aty prezent për të dhënë kontributin e tij.
Fakti që shumica e ekipit “Vllaznia B” është e përbërë nga futbollistë të rinj, e bëjnë “veteranin” Borshi (ai është vetëm 23 vjeç në fakt) një figurë shumë të respektuar nga të gjithë.
Në ndeshjen e fundit ndaj Kukësi B që shkodranët e fituan thellë 7-2, edhe mbrojtësi- kapiten la shenjën e tij duke shënuar golin e dytë nga pika e bardhë e 11-metërshit.
Por po gjatë pjesës së parë ka qenë shumë pranë realizimit të një kryvepre teksa ka kaluar njëri pas tjetrit 2-3 mbrojtës të ekipit kundërshtar dhe më pas edhe portierin por në fund, nga një kënd shumë i ngushtë, ka arritur të godasë vetëm pjesën e jashtme të shtyllës dhe më pas topi ka përfunduar jashtë.
Me paraqitje të tilla padyshim që Ergi Borshi duhet të shihet ndoshta me sy tjetër edhe nga stafi i ekipit të parë sepse po kalon një formë shumë të mirë sportive, prandaj dhe do të ishte një element i rëndësishëm për skuadrën dhe jo vetëm në pankinë.
© shkodrasport.com
