Luftëtari i kishte bërë ndryshe planet, por deri më tani nuk ka një zgjidhje.
Prej së hënës me bluzinjtë po stërvitet mesfushori Erjon Vucaj, i cili ende nuk është zyrtarizuar nga bluzinjtë dhe kjo jo pa arsye.
Ende nuk ka një kontratë të nënshkruar, por palët janë dakord për kushtet e bashkëpunimit.
Pengesa vjen nga Shkodra. Me Vllazninë, verën e shkuar, mesfushori nënshkroi një kontratë “1+1” dhe duket se ajo është zgjatur edhe për sezonin e ardhshëm.
Me kuqeblutë që ende nuk kanë një Bord dhe një administrator, situata bëhet edhe më e vështirë.
Askush nuk ka “tagrin” ta lëshojë lejekalimin (edhe sikur të pranohet zgjidhja e kontratës me marrëveshje), pasi Astrit Gyrezi u dorëhoq dhe tanimë duhen zgjedhur organet drejtuese të klubit.
Më 26 qershor pritet të mblidhet Këshilli Bashkiak, që do të përzgjedhë Bordin Mbikëqyrës dhe administratorin e ri.
Luftëtari nga ana tjetër kërkon të dijë se çfarë do të ndodhë, pasi ditët po ikin dhe duhet plotësuar lista e lojtarëve që mund të luajnë në ndeshjet e Europa League kundër Ventspils.
Ndërkohë nesër nis edhe faza përgatitore në Slloveni dhe ende nuk është përcaktuar lista e lojtarëve që do të jenë nën urdhrat e trajnerit Milos Kostic.
Gjatë fazës përgatitore Luftëtari do të ketë mundësinë të zhvillojë edhe katër ndeshje miqësore, që do të vlejnë shumë para sfidës së parë me letonezët e Ventspils.
Synimi është kualifikimi, ndërkohë që drejtuesit kanë arritur të bindin edhe Dejvi Bregun për t’iu dhëne një dorë në Europa League./EDS/
