Veleçiku i sivjetëm është një skuadër shumë interesante. Ka arritur deri më tani dy fitore por ndërkohë edhe kur ka humbur ndaj ekipeve pretendente si Vllaznia e Dinamo, ka luajtur shumë denjësisht.
Ajo që të bën përshtypje tek kjo skuadër mbi të gjitha është “zbulimi” i këtij sezoni. Bëhet fjalë për brazilianin Fabio Alexandre De Sa Junior. Ka ardhur në fundin e merkatos tek koplikasit dhe ai që e ka sjellë është Rudi Vata.
Kemi të bëjmë me një lojtar i cili pozicionin e tij të preferuar ka atë të mbrojtësit të djathtë por tek Veleçiku, për nevoja të skuadrës po luan si mesfushor i këtij krahu.
Dhe po e bën shumë mirë edhe këtë detyrë. Madje, edhe në ndeshjen e fundit ndaj Vllaznisë, ai ka vënë në alarm mbrojtjen kuqeblu me shpejtësinë dhe lirshmërinë e tij në veprime.
Aq sa mbrojtësi shkodranë u detyruan të luajnë edhe ashpër për ta ndalur. Fabio ka fituar shumë shpejt simpatinë e tifozëve të Malësisë së Madhe por edhe të drejtuesve.
Aq sa të gjithë përmendin vetëm emrin e tij. I datëlindjes 29 maj 1995, braziliani ka luajtur vetëm në vendin e tij dhe ndoshta kjo ështëë arsyeja që duke luajtur me Veleçikun, të bjerë në sy për t’u transferuar pastaj në ndonjë ekip tjetër.
E rëndësishme është që në Koplik dhe zonat rreth tij, tashmë të gjithë flasin për të. Ka fituar simpatinë e të gjithëve dhe vetë braziliani duket se ka dëshirë të komunikojë me të gjithë.
Dikush me të qeshur i thotë “mafioz”, dikush tjetër kujdeset për të mos e lënë asnjë moment vetëm. Tek Veleçiku janë të bindur se kanë një “pasuri” në rradhët e tyre dhe ai është Fabio Alexandre De Sa Junior.
© shkodrasport.com
