Kohët e fundit jemi mësuar të dëgjojmë shpesh për oferta dhe shifra rreth transferimit të mundshëm të sulmuesit shkodran të Kukësit Sindrit Guri.
Nga Korea, nga Portugalia apo vende të ndryshme të botës, janë disa ekipe që duan të marrin shërbimet e sulmuesit 24 vjeçar.
Në media kanë dalë edhe disa shifra që mendohet të jenë ofruar nga klube të ndryshme për këtë futbollist por drejtuesit e Kukësit ende nuk kanë vendosur për të.
Ai që ka “zbuluar” shumën më të madhe të ofruar deri më tani për këtë lojtar është menaxheri i kampionëve në fuqi të vendit Naim Halili.
Në një prononcim për “newsport”, ai është shprehur: “Guri është lojtari i momentit jo vetëm në Shqipëri por edhe në Ballkan.
Ka shumë oferta por presidenti vështirë se do ta lëshojë pa plotësuar kërkesat ekonomike.
Deri tani shifra e ofruar për futbollistin është 700 mijë euro. Por, presidenti kërkon me të drejtë një shumë më të madhe dhe një përqindje të kartonit të lojtarit.
Me cilësitë që ka Guri, unë e kam krahasuar me Levandovskin dhe Xhekon. Guxoj të them që ka edhe më shumë cilësi se këta”.
Nga sa mësohet, Kukësi ka ndër mend të përfitojë një shumë prej 1 milionë eurosh për shitjen e këtij lojtari dhe të mbajë 10 apo 20 për qind të kartonit të tij.
Jo keq besojmë për një futbollist shqiptar por edhe për një klub tonin që do të nxjerrë kësisoj shpenzimet e sezonit të ardhshëm vetëm nga shitja e këtij futbollisti.
© shkodrasport.com
