Në shtator të vitit 2011 duke përfaqësuar Bullgarinë në Kampionatin Botëror që zhvillohej në Stamboll të Turqisë, ai zuri vendin e parë në peshën 96 kg dhe do të shpallej kampion Bote. E kemi fjalën për mundësin e mirënjohur shkodran Elis Guri i cili mori famën e duhur prej atij suksesi duke u konsideruar një prej më të mirëve në Botë për këtë sport.
Por prej janarit të këtij viti ndërkohë 37 vjeçari shkodran mësohet se ka nisur një detyrë tjetër: Atë të trajnerit të kombëtares së Bullgarisë. Drejtuesit e kësaj Federate, duke besuar në aftësitë e Elis Gurit, i kanë propozuar një vend në stafin e trajnerëve të kësaj kombëtareje dhe ai e ka pranuar menjëherë.
Një gjë të tillë na e ka zbuluar për “Shkodra Sport” vetë Elisi i cili ka pranuar me kënaqësi të japë edhe një intervistë duke shpjeguar detyrën e tij tashmë të re.
– Elis, ju kemi parë në disa foto bashkë me pjestarë të kombëtares bullgare. Keni nisur ndonjë detyrë të re pranë saj?
– Po, prej janarit të këtij viti kam nisur punë si trajner i kombëtares së Bullgarisë. Jam bashkë me tre trajnerë të tjerë dhe e kam marrë me shumë dëshirë këtë detyrë të re. Kam firmosur tashmë kontratën me Federatën dhe kam nisur punë.
– E dispononi liçensën e trajnerit që duhet për të ushtruar këtë profesion?
– Po, po, e kam marrë prej tre vitesh.
– Ishte oferta e drejtuesve të Federatës bullgare ajo që ju bindi për të marrë këtë detyrë?
– Drejtuesit e Federatës ma propozuan një detyrë të tillë dhe unë e pranova me kënaqësi sepse është gjëja më e mirë që di të bëj, të merrem me këtë sport. Unë kam punuar dy vjet në Univervitetin “Luigj Gurakuqi” si asistent- profesor por të them të drejtën, të punosh si trajner është ndjesi krejt tjetër dhe ndihem mirë për këtë.
– Vetë jeni shpallur kampion bote, do të mund të provoni të njëjtat emocione por tashmë si trajner duke nxjerrë sportistët tuaj kampionë?
– Patjetër që po dhe jam i bindur për këtë. E njoh rrugën drejt suksesit dhe çdo gjë që ka të bëjë me këtë sport. Prandaj shpresoj të jem i dobishëm për sportistët e mi dhe me to të arrijmë suksese të mëdha.
– Duket se e keni nisur mirë detyrën sepse në Kampionatin Europian që u zhvillua në shkurt patët disa suksese, apo jo?
– Një nisje e shkëlqyer. Në Kampionatin Europian që u zhvillua në Romë nxorrëm një kampion Europe, një nënkampion dhe dy të tjerë u renditën në vendin e pestë. Bashkë me tre trajnerët e tjerë të kombëtares që përbëjmë dhe stafin e saj, jemi të bindur se sukseset nuk do të mungojnë edhe në vijim. Kishim shpresa për sukses edhe në Lojërat Olimpike të këtij viti por tashmë përgatitjet janë ndërprerë sepse siç e dini, ato janë shtyrë për vitin e ardhshëm si shkak i pandemisë.
– Elis të falenderoj për intervistën dhe të uroj suksese tashmë në karrierën tuaj si trajner…
– Faleminderit juve për interesimin e vazhdueshëm.
Gjergj KOLA
