Pas Vllaznisë, basketbollisti shkodran Herion Faslija largohet edhe nga Teuta. Një lajm të tillë e ka konfirmuar për televizionin Rozafa vetë ai. Arsyeja sipas tij, është mospërmbushja e detyrimeve kontraktuale nga ana e drejtuesve durrsakë dhe në fund, palët kanë rënë dakord për ndërprerjen e kontratës. Në fakt, të gjithë sportdashësve shkodranë të pranishëm pasditen e së shtunës që shkoi në pallatin e sportit “Qazim Dervishi” për të ndjekur ndeshjen Vllaznia- Teuta, u ka bërë përshtypje mungesa e shtatëlartit shkodran në rradhët e ekipit bregdetar.
Shumëkush ka menduar se mund të ishte ndonjë dëmtim i tij por në fakt ka rezultuar tjetër gjë. Faslija bën të ditur se arsyeja e mungesës ka qenë largimi përfundimtar i tij nga Teuta ngaqë gjërat nuk shkuan ashtu siç i kishin premtuar në fund të dhjetorit kur ai la Vllazninë për të bërë këtë kalim tek një tjetër ekip pretendent për titull. Arsyeja e lënies së Shkodrës natyrisht që ka qenë financiare por kjo nuk zgjati shumë dhe tashmë ky lojtar, që njëkohësisht është edhe anëtar i ekipit tonë kombëtar, ka mbetur pa ekip deri në fund të këtij sezoni. Një fakt disi i çuditshëm sepse çdo skuadër e kampionatit shqiptar ka nevojë për një basketbollist të tillë megjithatë zgjedhjet e tij nuk kanë rezultuar ato të duhurat. Gjatë muajit janar, u përfol shumë për një rikthim të tij në Shkodër, madje pati edhe një ftesë publike nga kryebashkiakja Ademi, megjithatë gjërat nuk morën zgjidhje sepse drejtuesit e Vllaznisë në fakt e kishin plotësuar ekipin me lojtarët amerikanë që blenë. Në këto rrethana Faslija qëndroi në Durrës por edhe vetëm për pak kohë sepse tashmë është larguar edhe prej atje. Mbase ky është një mësim për të, për t’i bërë zgjedhjet ashtu si duhet në vazhdim të karrierës së tij.
© shkodrasport.com
