Suksesi i Vllaznisë në basketboll për të rinj që u shpall kampion i Shqipërisë për këtë sezon, padyshim që ka patur brenda kontributin e disa prej lojtarëve më kyç të saj. Një ndër to është edhe Fatjon Kuçi. Sidomos në ndeshjet e fundit të kampionatit, ai ka qenë një ndër më përcaktuesit në këtë sukses.Në një prononcim për gazetën “Shkodra Sport” megjithatë ai ndjehet modest duke thënë se meritë ka i gjithë ekipi. “Ndeshjet gjysmëfinale dhe ato finale, kanë qenë të dominuara nga ne dhe mendoj se nuk ka asnjë mendim ndryshe përveç atij që Vllaznia e meritoi këtë titull kampion. Ky ekip ka disa elementë të mirë me të cilën besoj se basketbolli shkodran mund të ecë përpara”- është shprehur Kuçi.
Ndërkohë trajneri Roland Koka është ndalur jo pak tek ky lojtar i cili sipas tij ka sakrifikuar jo pak këtë sezon e prandaj thotë: “Fatjon Kuçi në veçanti duhet përgëzuar për sakrificën që ka bërë sepse ka patur një dëmtim jo të vogël në shtyllën kurrizore megjithatë me durim dhe shumë punë, arriti të rikthehej në formën e tij më të mirë dhe në ndeshjet e turit final, ka qenë një ndër më të mirët në fushën e lojës”. Me siguri që të dhënat e këtij lojtari garantojnë një element të së ardhmes për basketbollin shkodran dhe kjo është ajo që vlen më shumë se çdo gjë tjetër.
© shkodrasport.com
