Futsalla është rikthyer pas disa vitesh pushim në Shkodër. Vllaznia po korr suksese nga java në javë e pretendimet e kuqebluve duken shumë të mëdha këtë sezon. Për këtë ka folur edhe Fatos Behari, kapiteni i Vllaznisë në futsallë.
Sipas portierit shkodran kundërshtari më i fortë është Flamurtari, por ambiciet e Vllaznisë janë që këtë sezon të pretendojë deri në fund për njërin nga trofetë.
Behari u shpreh duke thënë: “Fituam një ndeshje kundër Diamant ditën e dielë. Dhe pavarësisht se shifrat përfundimtare ishin 4-12, nuk e nisëm në mënyrën e duhur. Kjo pasi ishim në disavantazh 2-0 pas pak minutash. Por skuadra reagoi shumë mirë dhe treguam kualitetin që kemi. Ne kemi në skuadër emra që kanë luajtur edhe në Superiore apo edhe Kategorinë e Parë.
Lojtarë si: Hasa, Lekaj apo Kiri janë ndër më të mirët në kampionat. Madje mund të them se rikthimi i Kirit na ka ndihmuar shumë dhe i jep nje fytyrë tjetër skuadrës. Ne kemi ambiciet tona këtë sezon pasi rikthehemi pas disa vitesh mungesë e duam të bëjmë sa më mirë.
Kundërshtari më i fortë është Flamurtari, që është një skuadër e mirë investuar. Ne jemi në vendin e dytë, me 3 pikë më pak se vlonjatët. Ku do kemi ndeshjen direkte me ta pas dy javësh. Minimalisht duam njërin nga trofetë, në kampionat apo në kupë. Ku në kupë patjetër duam që të kapim finalen e të pretendojmë për trofeun”.
Endri ÇINARI
