Me ndeshjet e javës së kaluar është mbyllur faza e dytë e kampionatit të kategorisë së parë dhe bashkë me të është përcaktuar tashmë edhe skema e ndeshjeve të fazës së tretë e cila do të nisë të shtunën që vjen. Njëkohësisht, sipas rregullores së përcaktuar që më përpara, Federata Shqiptare e Futbollit ka bërë edhe përgjysmimin e pikëve për të gjithë ekipet.
Padyshim që nga ky rregull, më e penalizuar nga të gjitha është Vllaznia e cila në mbyllje të fazës së dytë e pa veten 12 pikë larg Erzenit të vendit të dytë, por në fakt, fazën e tretë do ta nisë me vetëm 6 pikë diferencë.
Megjithatë kjo nuk do të thotë se objektivi i ekipit shkodran do të ndryshojë. Ai synon me çdo kusht Superligën dhe do ta vijojë këtë mision që në ndeshjen e kësaj jave, atë që do të luajë ndaj Korabit në Peshkopi.
Por duhet thënë se përveç Erzenit të vendit të dytë, edhe Besëlidhja e vendit të tretë ende shpreson ndonëse ndodhet 7 pikë larg nga shkodranët.
Deri në fund të kampionatit kanë mbetur edhe tetë ndeshje, megjithatë gjithçka sa i takon skuadrës që do të ngjitet në Superligë pritet të sqarohet brenda 2-3 javësh. Vllaznia duket më në avantazh se të gjithë ekipet e tjera dhe kjo për shumë arsye.
