Erkand Qerimaj duhet të dorëzojë pranë Federatës Europiane të Peshëngritjes medaljen e artë të fituar në Kampionatin Europian të zhvilluar në prill të këtij viti në Antalia të Turqisë, ku dhe fitoi titullin e kampionit të kontinentit. Në një letër që ka dërguar dje Federata Ndërkombëtare ka bërë me dije drejtuesit e shtangës shqiptare për ndryshimet në renditjen e sportistëve pas rasteve të dopingut të evidentuara në vitin e fundit, që kanë sjellë edhe ndryshimet përkatëse. Kështu, peshëngritësi shkodran Erkand Qerimaj, që doli pozitiv në atë Europian dhe u dënua me 16 muaj pezullim, do të kthejë pas medaljet e arta të fituara në shtytje dhe në dy-garësh si dhe medaljen e argjendit në shkëputje, të 3 në peshën 77kg. Këto 3 medalje do t’i shkojnë peshëngritësve që janë renditur pas tij në kategoritë përkatëse.Pavarësisht apelimit që bëri Qerimaj, nuk pati asnjë vendim për ta shfajësuar atë, thjesht u bë një zbritje e dënimit teksa ai do të jetë i pezulluar për një periudhë 16 mujore.
