Vendi I tetë në fundin e fazës së parë të kampionatit dhe eliminimi nga Kupa e Shqipërisë, I ka zhgënjyer të gjithë në Shkodër. Tifozë, drejtues por edhe ish-futbollistë të Vllaznisë, ndjehen jo pak keq kur e shohin skuadrën e tyre të vuajë. Ferid Borshi, një nga emrat e njohur të Vllaznisë së viteve ’80 dhe që pak ditë më parë bashkë me veteranët e tjerë të Vllaznisë fitoi edhe kupën “Pavarësia” që u zhvillua në Vlorë, ndjehet keq kur e sheh atë të vuajë. Sipas logjikës së tij, mundohet të bëjë edhe një analizë të ecurisë së saj duke u ndalur konkretisht tek dy takimet e fundit.
“Mbyllja që Vllaznia I bëri fazës së parë të kampionatit nuk ka qenë aspak dinjitoze, madje mund ta quajë një surprizë të hidhur për tifozët por edhe për drejtuesit e saj. Një Vllazni komplet e çuditshme, një Vllaznia komplet e çoroditur. Skuadra e filloi dobët kampionatin, pati një rritje më pas me oshilacione të mëdha dhe prapë tani ka një zbritje. Unë do ta cilësojë këtë Vllazni të pashpjegueshme sepse duke I parë edhe ndeshjet, nuk di ku t’I gjesh edhe të metat e saj. E fillon lojën duke pësuar gol, vazhdon me një ritëm të ulët, mund të hajë edhe një gol të dytë apo dhe të tretë siç ishte rasti I ndeshjes me Flamurtarin dhe ndoshta për momentin mund të mendosh se ky ekip nuk është I përgatitur fizikisht. Por nuk është kjo. Në 25 minutat e fundit skuadra shpërthen dhe rezultati barazohet. E njëjta situatë thuajse është edhe me Kastriotin kur sërish pëson gol shpejt dhe skuadra reagon në pjesën e dytë”- ka thënë Borshi që sot drejton një nga ekipet e 19 vjeçarëve të Vllaznisë. Analiza e mësipërme sigurisht që është sipërfaqësore megjithatë ish-mesfushori I kësaj skuadre vite më parë, nuk ngurron të ndalet më në detaje duke përcaktuar edhe të meta të tjera në lojën e saj. “Në këto ndeshjet e fundit, Vllaznia ka treguar se është shumë dobët në vijën mbrojtëse. është krejt e habitshme të shpjegosh se si ka mundësi që me tre vertikalizime që janë ba si në ndeshjen me Flamurtarin ashtu edhe me Kastriotin, pësojmë gola fatale. Të gjashtë këto gola janë në qendër të mbrojtjes. Mjafton të ndalemi tek golat e pësuar në Krujë. Sulmuesi që shënoi golin e parë të Kastriotit, ndodhet përballë 3-4 mbrojtësve të Vllaznisë, të cilët I shmang të gjithë me një lëvizje të vetme. është komplet e habitshme sesi lojtarët nuk reagojnë. Dobësi ka edhe në mes të fushës ku lojtarët e këtij reparti nuk vertikalizojnë topa në drejtim të sulmit, ndërkohë që mungon thuajse krejtësisht edhe loja nga krahët. Nga ana tjetër, unë akoma nuk e marr vesh se kush është sulmuesi I mirëfilltë I Vllaznisë. Tek Vllaznia mungon organizimi I lojës, mungon disiplina në fushë por edhe ajo jashtë procesit sportiv. Por ka edhe një papërgjegjshmëri të madhe tek futbollistët”- thotë më tej Borshi. Nesër ndërkohë, do zhvillohet analiza e shumëpritur në klubin shkodran ku do përcaktohet qartë edhe e ardhmja e trajnerit dhe disa prej lojtarëve. Për një nga veteranët e Vllaznisë, masa është mirë të merren por ato duhen bërë me kujdes dhe të gjenden zgjidhje më të mira, çka në këtë periudhë është e vështirë. “Tani mendoj se është një periudhë që ndoshta jo të gjitha fajet duhet t’I ngarkohen trajnerit. Trajneri mund të ketë gabimet e veta por pjesën më të madhe e kanë lojtarët. Nuk ma merr mendja se trajneri s’e ka zhvilluar stërvitjen ashtu siç duhet por nuk është faji I tij nëse lojtarët pas stërvitjes abuzojnë dhe prishin gjithçka. Kam dëgjuar që e akuzojnë trajnerin Duro për merkaton. Unë nuk e di taman se kush e ka bërë këtë merkato por megjithatë nuk është e vështirë ta kuptosh se ka qenë një merkato e dobët. Jam kategorisht kundër idesë që Vllaznia të ketë 11-12 lojtarë të huaj. Në Shkodër kjo as nuk duhet menduar. Duhet të kesh një bosht me lojtar vendas sepse këta të fundit nesër a pasnesër nuk I ke më në ekip, plus që për ta ka edhe një shpenzim shumë të madh. Tek drejtuesit e Vllaznisë ekziston ideja për të larguar lojtarë por pyetja që lind është e thjeshtë: Kë do të marrësh? Jam për të ofruar të rinjtë por edhe ata kanë humbur shumë këtë sezon sepse janë aktivizuar shumë pak. Për të gjitha këto, besoj se drejtuesit duhet të maten mirë para se të vendosin”- ka thënë në fund të prononcimit të tij Ferid Borshi që edhe vetë ka qenë pjestar I stafeve drejtuese të Vllaznisë në vitet 1998 dhe 2001 kur ajo ka qenë për herë të fundit kampione e vendit.
Gjergj KOLA
