Auron Miloti është një ish-sulmues që ka lënë gjurmë në futbollin shqiptar të viteve ‘90. Fillimisht luajti për skuadrën e vendlindjes, Vllazninë (1992- 1994) e më pas u transferua te Tirana, ku në katër sezone radhazi arriti të fitonte tre tituj kampionë me fanellën bardheblu. Miloti jeton prej dy dekadash në Austri, aty ku edhe i dha fund futbollit, ndërsa sot në moshën 47-vjeçare i vjen në ndihmë Vllaznisë në rolin e skautit.
miloti
I kontaktuar dje nga “Panorama Sport”, Miloti pranoi t’i bënte një analizë ecurisë së shkodranëve këtë kampionat. Ai komentoi edhe “Klasiken” që do të luhet nesër në orën 16:45 në stadiumin “Loro Boriçi”. Për ish-sulmuesin, fitorja e kuqebluve do të rihapte garën për titull në Superiore.
Auron, Vllaznia e nisi sezonin për titull, madje vetë drejtuesit kanë deklaruar se janë pretendentët kryesorë. Çfarë nuk ka shkuar sipas jush në këto 24 javë kampionat?
Pretendimet për titull janë ende përderisa matematika e lejon. Megjithatë, tani është bërë edhe më e vështirë lufta për titull, sepse Tirana kryeson e vetme me diferencë pikësh.
Laçi dhe Kukësi janë aty dhe gjithashtu luftojnë për titull. Ndoshta edhe oshilacionet që kemi pasur çdo ndeshje, kanë ndikuar në ecurinë e kampionatit. Dëmtimet, kartonët dhe gjendja jo e mirë e lojtarëve kryesorë janë pjesë e ecurisë jo të mirë.
Pozicioni në të cilin ndodhet aktualisht Vllaznia e justifikon investimin për ndërtimin e skuadrës në verë?
Pozicioni që ne jemi nuk i përgjigjet ndërtimit të skuadrës. Është ndërtuar një ekip, ku synimi primar është kampionati, pastaj ai minimal mbetet pjesëmarrja në Kupat e Europës.
Vllaznia thuajse nuk ndërhyri në merkaton e dimrit. Tashmë që kanë kaluar gati tre muaj, mendoni se klubi mund të jetë bërë pishman?
Unë mendoj se në merkaton e dimrit ishte e vështirë të gjejë lojtar që mund të na ndihmonte aty ku ne kishim nevojë.
Ku qëndron sipas jush ngërçi te Vllaznia?
Mund të them që është vetëm një ngërç psikologjik.
Si një ish-sulmues, cili është mesazhi juaj për lojtarët në vazhdimësinë e këtij sezoni?
Duhet të jenë më të qetë në zgjidhjen e situatave që krijon 90-minutëshi. Të japin 100% në të gjitha ndeshjet e mbetura.
Të shtunën luhet “Klasikja” me Tiranën, si e shikoni këtë takim?
Kjo ndeshje ka qenë dhe është bukuria e futbollit shqiptar. Luajnë dy skuadrat me të vjetra të futbollit tonë, nga të cilat kanë dalë një numër i madh kampionësh.
Me Tiranën kanë qenë gjithmonë ndeshje shumë të bukura dhe të forta. Edhe të shtunën do të jetë një shfaqje e bukur, si në fushën e futbollit, po ashtu edhe në tribuna.
Ju keni fituar tri herë titullin kampion me Tiranën pasi u larguat nga Vllaznia në vitin 1994. Çfarë kujtoni nga ajo periudhë?
Për mua ka qenë gjithmonë e vështirë të luaja kundër Vllaznisë, ekipit ku u rrita si futbollist (Vllaznisë) dhe mësova edukatën sportive. Këtë e shfaqa me Tiranën, prandaj edhe nga këto dy skuadra kam kujtimet më të bukura nga aktivizimi në kampionatin shqiptar.
Tirana kryesuese vjen në Shkodër në një situatë komode, mendoni se do të jetë favorite për të fituar apo besoni te Vllaznia?
Në këto ndeshje nuk ka favoritë. Këto takime fitohen edhe me mbështetjen e tifozërisë dhe shpresoj që në këtë shfaqje të bukur të futbollit, sportdashësit të mos mungojnë.
Prania e tyre do të sjellë një festë të bukur në stadiumin “Loro Boriçi”. Të jem i sinqertë, pavarësisht kohëve të bukura që kam kaluar me Tiranën, unë jam shkodran dhe shpresoj e dëshiroj që këtë ndeshje ta fitojë Vllaznia.
Një fitore e Vllaznisë e fut sërish këtë skuadër në valle për titull apo duhet të kënaqet këtë sezon me Kupat e Europës?
Kampionati bëhet edhe më i bukur me një fitore të Vllaznisë. Pra, e hap përsëri mundësinë për titull. Arritja në Kupat e Europës është synimi minimal që ka klubi Vllaznia.
