Pesë humbje dhe dy barazime. Kjo është ecuria e Flamurtarit në shtatë javët e fundit të kampionatit.
Kuqezinjtë kanë shkuar dhjetë minuta larg fitores, por nuk kanë arritur ta sigurojnë atë, madje janë përmbysur 2-1 nga Kukësi në minutat e fundit të ndeshjes.
Pas një pjese të parë shumë të luftuar, të mbyllur në barazim 0-0, ndeshja është zbllokuar në minutën e 68-të me Camara.
Ky i fundit mund ta kishte mbyllur ndeshjen në të 76-ën, por goditja e tij me të djathtën është ndalur nga shtylla.
Dhjetë minuta para fundit të ndeshjes ka ardhur kundërpërgjigja e miqve, të cilët kanë barazuar me një gol të Gurit.
Kjo goditje e papritur ka trullosur vendasit, të cilët janë ndëshkuar përsëri në minutën e 88-të nga Ebipi, i cili i ka dhuruar fitoren miqve.
Kukësi ka përforcuar vendin e dytë dhe ka shkuar gjashtë pikë larg laçit të vendit të tretë në renditje, ndërsa Flamurtari mbetet në vendin e pestë me 37 pikë. /telesport/
