Nga tre amerikanët e ardhur në Shkodër në nëntorin e vitit të kaluar, vetëm ai vazhdon të jetë pjesë e Vllaznisë sepse ka bindur me performancën e tij.
Malik Carter konsiderohet një nga lojtarët më të rëndësishëm të kuqeblue, megjithatë në një prononcim për mediat, ai ka deklaruar se ekipi duhet të vazhdojë të punojë fort për të arritur objektivin që ka.
Basketbollisti amerikan po ashtu ka vlerësuar edhe punën e trajnerit Plantak si dhe dy prej bashkëatdhetarëve të tij të ardhur së fundmi tek Vllaznia. “Ndjehem mjaft mirë në Shkodër. Jam i kënaqur me punën që po bëhet tek dhe me stërvitjen e trajnerit.
E rëndësishme është të vazhdojmë kështu. I kam parë tashmë disa nga kundërshtarët tanë në kampionat dhe kam kuptuar se janë skuadra shumë të forta, megjithatë do jenë përballjet në vazhdim me ta që do të na bëjnë të kuptojmë se ku jemi.
Kanë ardhur dy basketbollistë të tjerë shumë të mirë dhe besoj se do të shkojmë përpara, për të arritur objektivin që kemi”- është shprehur Carter.
Kuqeblutë janë duke projektuar edhe një miqësore të cilën do ta luajnë ndaj ekipit të Ulqinit, miqësore kjo që do të jetë e treta në këtë fazë përgatitore përpara nisjes së ndeshjeve zyrtare për këtë vit.
© shkodrasport.com
