Një malazez ka udhëhequr Vllazninë në titullin e fundit të fituar, pikërisht në sezonin 2000- 2001. Trajneri Dervish Haxhiosmanoviç, i cili në Shkodër kishte nofkën “Deda”, ka lënë një përshtypje të jashtëzakonshme te tifozët kuqeblu.
Ai arriti që të fitonte edhe Kupën e Shqipërisë në vitin 2008 si trajner i Vllaznisë, ndërsa e ka drejtuar skuadrën shkodrane në pesë periudha të ndryshme në dy dekadat e fundit. I kontaktuar dje nga “Panorama Sport”, Haxhiosmanoviç befasoi me faktin se vijon të jetë një ndjekës i rregullt i kampionatit shqiptar, paçka se jeton në Mal të Zi dhe deri një vit më parë drejtonte Kombëtaren e Femrave të këtij shteti.
“Deda” është i qartë kur pyetet se kush ka më tepër shanse për të dalë kampion këtë sezon. “Për mua, pa diskutim që titullin e fiton Partizani, ndërsa Kukësin e shoh të dytin deri në fund. I shoh të kuqtë kampionë, sepse mbi të gjitha janë një klub i mirorganizuar, duke filluar nga stafi teknik që kanë, si dhe presidenca.
Partizani ka më tepër potencial financiar se klubet e tjera. Me aq sa kam parë, në përbërje ka të paktën 18 lojtarë që mund të luajnë pa frikë në formacion. Nuk mendoj se në skuadrat e tjera është ky luks si te Partizani”, ka thënë fillimisht Haxhiosmanoviç.
Në fund, ai bëri një koment edhe për trofeun e dytë më të rëndësishëm në vend. “Të mos harrojmë se edhe në Kupën e Shqipërisë do të ketë një garë të fortë këtë vit. Kam një bindje se do e fitojë Teuta këtë trofe”, theksoi 59-vjeçari nga Mali i Zi.
