Orjan Xhemalaj është një nga lojtarët me eksperiencë dhe të spikatur në Kategorinë e Parë që të Erzeni po shfaqet si lider. Ballshioti Xhemalaj ka provuar që të luaj në Superiore me Teutën e Dinamon, por edhe në Kategorinë e Parë me shijakaset dhe Dinamon. Në një intervistë për “Vipsport”, Xhemalaj thotë se formula duhet që të ndryshojë, por parashikon edhe skuadrat që do të ngjiten në elitë.
-Xhemalaj, ka nisur faza e tretë dhe Erzeni bëri një hap fals duke e bërë më të vështirë objektivin…
Në Lezhë nuk mundëm të fitonim edhe pse luajtëm më mirë. Por, formula kështu është e Kategorisë së Parë. Unë kam disa vite që luaj në këtë kategori dhe kjo formulë mendoj se duhet ndryshuar.
-Ku e konstatoni ku thoni se formula duhet ndryshuar?!
Jo vetëm te Erzeni, por edhe te skuadrat e tjera, pastaj edhe faza e tretë. Imagjinoni, Erzeni ka 3-4 sezone që lufton dhe synon Superioren. Egnatia po ashtu, apo dhe Bylisi vjet e ndonjë ekip tjetër që lufton dhe investon pothuajse në pjesën më të madhe të sezonit dhe në fund nuk ngjitesh. Mendoj që duhet të ketë një ndeshje shtesë e vendit të dytë të Kategorisë së Parë, me një nga ekipet e Superiores. Kështu bëhet gara më e bukur si në Kategorinë e Parë, ashtu edhe në elitë. Pastaj edhe faza e tretë lë për të dëshiruar…
-Mendoni se ka dështuar kjo formulë?!
E thash faza e tertë lë për të dëshiruar sepse po shohim që ka edhe aleanca. Kur bën një formulë të tillë, natyrisht që edhe ndarjet e ekipeve duhet që të jenë më të detajuara. Nuk mund të ketë në një grup skuadra të së njëjtit qark…Jo vetëm kaq, por s’mund të ndahet në dy grupe, sepse është e papranueshme që në pjesëtimin e pikëve rrezikon sezonin.
-Duke qenë se jeni një lojtar me eksperiencë, si duhet të jetë Kategoria e Parë?!
Mendoj ose me dy grupe, ku vendet e para ngjiten direkt dhe vendet e dyta luajnë ndeshje “Play-off” me ekipet e Superiores. Pra, ashtu si edhe janë dy vendet e fundit, sepse gara do të jetë më e bukur. Një garë me dy faza do të ishte ideale, apo edhe me një grup të vetëm.
-Nga të dyja ekipet kush janë ekipet që do të ngjiten në Superiore këtë sezon?!
Di të them që Erzeni do të respektojë kampionatin deri në javën e fundit për hatër të tifozëve tanë, ndonëse Vllaznia duket e shkëputur me 8 pikë, që do të thotë duhet të dështojë në tre ndeshje. Kurse në Grupin e Jugut, Bylisi ka ekipin më të organizuar, ka kualitete, plus edhe ka kryesuar nga fillimi deri në fund dhe bën diferencën në çdo ndeshje.
-Ku do e shohim Xhemalajn në sezonin e ardhshëm?!
Të mbyllim njëherë këtë kampionat, është ende herët. Erzeni është zgjedhja ime e parë, zgjedhje zemre sepse jam si në shtëpinë time. Megjithatë të shohim, vera e gjatë është përpara…
