Finalja e së dielës ndaj Partizanit, e para në serinë e takimeve finale për Vllazninë, pritet me shumë interes në Shkodër. Emocionet e takimit të tretë gjysmëfinal ndaj Tiranës janë ende prezent tek të gjithë pjestarët e ekipit shkodran në fakt.
Këtë gjë e pranon edhe një nga pikat më të forta të këtij ekipi, “liberoja” Renato Kola i cili në një prononcim për “Shkodra Sport” do të shprehej: “Në 17 vite që luaj volejboll për fanellën ma të shenjtë në bote, atë të “VLLAZNISË”, këtë sezon nuk do ta harroj kurrë. Një mbyllje e 2 fazëve të kampionatit veç me një humbje dhe të gjitha fitore.
Jam shumë i lumtur me kualifikimin në finale pas një luftë të ashpër sportive kundër ekipit të Tiranës ku dolëm triumfues. Këtu gjej rastin të përshëndes gjithë bashkëlojtarët e mi, stafin drejtues dhe në veçanti tifozat që na përkrahën e juve si TV që na mbështesni kudo”.
Por sakaq, tashmë mendja është tek takimi i parë final, ai ndaj Partizanit që do të luhet sërish në Shkodër, të dielën në orën 19.00. Duke folur në lidhje me këtë taki, Renato Kola do të deklaronte: “Përsa i përket finales kundër ekipit të Partizanit, kemi favorin fushë në anën tonë. Po ashtu kemi edhe optimizëm e motivim maksimal për të dalë fitimtarë në këtë sezon, pa harruar se në sport çdo gjë ndodh.
Mendoj dhe shpresoj që të shpallemi kampion për herë të dytë brenda 3 viteve. Do luftojmë deri në pikën e fundit për të marrë titullin kampion i Shqipërisë për herë të dytë në historinë e sportit të volejbollit shkodran. Gjej rastin e iu bëj thirrje tifozërisë së zjarrtë shkodrane të mbushin pallatin e sportit e t’ia dalim mbanë të gjithë sëbashku”
© shkodrasport.com
