Ilir Allmuca është një nga shtyllat të ekipit të Dinamos. Vet emri i kësaj skuadre automatikisht të mbush me përgjegjësi dhe me histori ndersa kur vesh fanellën e këtij ekipi atëherë përpos këtyre të jep nder.
Mbrojtësi i bluve, ka qenë një nga më të mirët e Kategorisë së Parë dhe jo vetëm të ekipit. Padyshim që për lojtar të tillë ka oferta, por qetësia të ndihmon të zgjedhësh ekipin e duhur, çka do të bëjë dhe Allmuça.
Edhe pse shumë larg Vllaznisë së vendit të Parë, ai dhe skuadra e Dinamos nuk i humbasin shpresat dhe qëllimi i tyre është të ngjiten në Superligë.Në një intervistë për newsport.al, Ilir Allmuça ka folur më gjërë për objektivat, veten e tij madje dhe për modelet që e frymëzojnë.
Intervista e plotë:
– Ju luani në një ekip të madh si Dinamo, që fatkeqësisht nuk është aty ku i takon. Cilat janë objektivat tuaja për fazën e dytë, pasi ngjitja në Superiore nuk duket dhe aq e kapshme?
Siç dihet Dinamo, pavarësisht që luan në Kategorinë e Pare e ka emrin e madh dhe fanellën e rëndë. Mua më vjën mirë që po jap kontributin tim për këtë ekip. Objektivat e klubit dhe tonat janë të ngjitemi në Superligë dhe do japim maksimumin në çdo ndeshje deri në fund. Pavarësisht se Vllaznia është shkëputur me shumë pikë para.
– Në një grup me lojtarë të rinj, cili është çelsi që do i’u mbajë të disiplinuar dhe të motivuar deri në fund?
Ne kemi një skuadër me lojtarë të rinj të gërshetuar me lojtarë që kanë eksperiencë. Ajo që do të na mbajë të motivuar deri në fund është fakti se çdo ndeshje duhet të jepet maksimumi nga ana jonë.
– Ju momentalisht luani në një nga rolet kyçe në skuadër, ku e shihni nevojën për përmirësim?
Çdo skuadrë ka nevojë për përmirësim sado e mirë që të jetë, pasi nuk ka ekipe perfekte. Mua si lojtar nuk më shkon përshtat ta them, pasi është stafi ai që merret me këto punë.
– Jeni shpallur si një nga lojtarët më të mirë të Kategorisë së Parë, po a keni pasur oferta nga ekipet e elitës?
Më vjen shumë mirë që jam zgjedhur te formacioni më i mirë dhe falenderoj ata që më votuan ose më dhanë besim. Kjo gjë më dha shtysë të përmirësohem dhe të punoj më shumë.
Kam pasur oferta por, akoma asgjë konkrete. Për momentin jam i fokusuar me ekipin tim dhe do të jap maksimumin për të arritur objektivat bashkë me shokët e skuadrës.
– Cili ekip apo lojtar i’u frymëzon më shumë në arenën europiane?
Ekipi që më frymëzon më shumë është Milani, pasi jam dhe tifoz me këtë skuadër. Ndersa lojtari që pëlqej më shumë është Sergio Ramos.
