Në ndeshjen e djeshme të kombëtares tonë U-21 ndaj Bjellorusisë, në formacionin e saj ka qenë edhe një futbollist shkodran që luan jashtë Shqipërisë.
Bëhet fjalë për Sebastian Spahiun (Shpuza). Ky ka qenë debutimi i tij me fanellën kuqezi dhe padyshim që kjo gjë i ka dhuruar emocione.
Aq sa ndoshta, nuk e kanë lejuar të shprehet ashtu si duhet në fushën e lojës.
Këtë gjë e ka pranuar edhe vetë Sebastiani që në profilin e tij në facebook shkruan: “Nuk ishte ndeshja më e mirë nga unë sot, por çfarë nderi të veshësh këtë fanellë”.
Kaq mjafton për të kuptuar emocionet e tij. Gazeta “Shkodra Sport” e ka kontaktuar mëngjesin e sotëm atë për t’i marrë një prononcim të shkurtër në lidhje me këtë grumbullim të parë me ekipet tona kombëtare.
Sebastiani është shprehur kështu: “Natyrisht që kam patur shumë emocione në këtë ndeshje të parë me fanellën kuqezi dhe ndoshta prej kësaj, nuk arrita të jap më të mirën.
Padyshim që kjo nuk është një gjë e mirë sepse trajneri të jep mundësinë por nuk arrin ta shfrytëzosh.
Megjithatë, besoj se në ndeshjet e ardhshme do të jetë histori tjetër”- ka deklaruar ai.
Spahiu (Shpuza) po njeh një rritje fantastike në karrierën e tij.
Aktualisht është vetëm 18 vjeç e gjysëm, ka një kontratë profesioniste me ekipin belg të Superligës Mouscron, ka luajtur 6 ndeshje në sezonin e fundit me të, nga të cilat 2 si titullar, ka dhënë 3 asiste dhe ka shënuar 1 gol.
Jo keq padyshim për një futbollist në këtë moshë që tashmë ka kapur edhe kombëtaren Shpresa.
Karriera e tij pritet të pësojë një rritje edhe në të ardhmen sepse të dhënat i ka për këtë gjë Sebastian Spahiu (Shpuza).
www.shkodrasport.com
