Nëse ka patur futbollist që sot ka spikatur mbi të tjerët, ai ka qenë mesfushori i Vllaznisë Florind Bardulla. Ka rikuperuar topa pa fund, ka luajtur me grintë dhe ka ndihmuar për të ndërtuar shumë aksione. Natyrisht që kuqebluve nuk u mjaftoi loja e tij. Një gabim i vetëm në mbrojtje dhe 2-3 të tjerë në sulm, kanë bërë që takimi të përfonte në barazim.
Shpeshherë Bardulla është parë të bëjë me duar drejt shokëve të ekipit që nuk i përgjigjeshin ritmit të tij dhe kjo e ka bërë jo pak nervoz. Mesfushori 25 vjeçar në fillim të sezonit me ardhjen e Hasanit dhe Vucajt u mendua se do të ishte zëvendësues por forma jo e mirë fizike e Vucajt ka bërë që ai të jetë në fushë dhe po e justifikon në mënyrën e duhur aktivizimin. Loja shumë e mirë në takimin e sotëm ndaj Flamurtarit është një garanci për aktivizimin e tij të mëtejshëm si titullar në formacionin kuqeblu.
© shkodrasport.com
