Trajneri i Vllaznisë Ernest Gjoka në konferencën e sotme për shtyp e ka konsideruar një mungesë të rëndësishme atë të Renato Malotës për ndeshjen e nesërme në Kukës.
“Shpresojmë që kjo çështje të mbyllet sa më shpejt dhe ai të bashkohet me skuadrën.
Malota është një pikë e fortë e skuadrës sonë dhe ishte shndërruar në një lider të repartit të mbrojtjes.
Padyshim që mungesa e tij ka ndikimin e vet në lojën e skuadrës megjithatë shpresoj që ta zëvendësojmë në mënyrën e duhur”- është deklaruar ai.
Po kush do të luajë në vendin e lezhjanit nesër në Kukës? Pak javë më parë kur Malota mungoi për arsye kartonash, në vend të tij në qendër të mbrojtjes luajti Orelesi.
A do të ndodhë kështu edhe nesër? Me shumë të ngjarë jo. Stafi teknik mendon që nigeriani të luajë në vendin e tij në mesfushë ndërkohë që në qendër të mbrojtjes do të jetë Denis Pjeshka.
Ky i fundit i ka lënë pas problemet që ka patur me dëmtimet dhe në ndeshjet e fundit ka treguar një gjendje të mirë.
Ndërsa nesër bashkë me Berishën do të kenë detyrën të ndalin Gurin dhe futbollistë të tjerë të repartit të sulmit të ekipit kukësian.
© shkodrasport.com
