Panucci i beson përvojës në sfidën e tretë në grup përballë Izraelit. Në një ndeshje për të mos u humbur, trajneri i kuqezinjve pritet të rreshtojë në fushë gardën e vjetër, me shpresën se eksperienca e lojtarëve që janë në xhiron e Kombëtares prej shumë kohësh do të ketë ndikimin e saj dhe në fushë.
Gjithsesi, risia pritet të mos mungojë në rreshtimin titullar përballë izraelitëve, me Myrto Uzunin, që pasi luajti në pjesën e dytë kundër Jordanisë, këtë herë pritet t’i besohet një fanellë titullari.
Rreshtimi i trajnerit Italian pritet të jetë 4-3-3, me Strakoshën që rikthehet titullar mes dy shtyllave, pasi në miqësoren me Jordaninë u aktivizua Berisha, në qendër do të luajnë Mavraj dhe Gjimshiti, ndërsa Hysaj është i sigurt në të djathtë.
Në të majtë ka një balotazh të vogël mes Binakut dhe Lenjanit, me të parin që është më i favorizuar, ndërkohë që në mesfushën me 3 do të luajnë Xhaka, Basha dhe Memushaj.
Në sulm, Grezda, që pati shqetësimë fizike, ka rikuperuar dhe pritet të luajë i hapur nga e majta, ndërsa në krahun e djathtë me shumë mundësi do të aktivizohet Uzuni, që goditi dhe shtyllën përballë Jordanisë.
Në majën e sulmit rikthehet titullar, Bekim Balaj që do të ketë peshën kryesore për të dërguar topin në rrjetë.
