Nuk i lanë klubet apo nuk deshën vetë lojtarët? Kjo është pyetja që ka lindur pasi disa futbollistë të përfaqësueses shqiptare nuk iu bashkuan dot kuqezinjve për ndehsjet e tetorit.
Sipas FSHF-së Klaus Gjasula, Ylber Ramadani, Etrit Berisha, Lindon Selahi dhe Florian Kamberi nuk janë lejuar nga klubet përkatëse që të udhëtojnë drejt vendit tonë. Por të paktën në rastin e Gjasulës, klubi i Hamburgut në Gjermani ia kalon topin vetë lojtarit.
Mesfushori është kthyer në një nga pikat më të forta të kuqezinjve në vitin e fundit nën drejtimin e trajnerit Reja dhe pavarësisht gabimit me Lituaninë, pritej të rreshtohej përsëri titullar në mesfushën kuqezi.
Por ai nuk do të udhëtojë drejt Shqipërisë për shkak të COVID-19 dhe rregullave të udhëtimeve në vende të ndryshme që kanë komplikuar situatën për shumë futbollistë. FSHF deklaroi se klubi nuk ka lejuar lojtarin, por nga ana tjetër, Hamburgu saktëson në faqen e vet në internet, se ka qenë futbollisti që e ka marrë vendimin.
“Klaus Gjasula nuk do të grumbullohet me ekipin kombëtar të Shqipërisë në këtë dritare të ndeshjeve ndërkombëtare. Rreziqet e infeksionit dhe një urdhër i mundshëm karantinimi pas kthimit, kanë shtyrë mesfushorin 30-vjeçar që të marrë këtë vendim, të cilin ai e diskutoi me trajnerin e ekipit kombëtar të Shqipërisë, Edoardo Reja”, shkruhej në faqen e klubit gjerman.
Me pak fjalë, Hamburgu bën të qartë se nuk ka ndaluar futbollistin, por ka qenë vetë ai që ka menduar më të arsyeshme që të mos udhëtonte drejt Shqipërisë. Një situatë e pakëndshme kjo për një lojtar që u kthye në emër kyç për mesfushën kuqezi e që tashmë do të shohë nga televizori dy sfida që mund të jenë vendimtare për shanset e kuqezinjve për të fituar grupin në Ligën e Kombeve. /vipsport/
