U duk se Federata Shqiptare e Futbollit kishte harruar shkodranët në nderimet që ajo bëri më mbrëmjen “gala” të festave të fundvitit sepse nuk kishte asnjë të dekoruar me titujt “Nderi i Futbollit shqiptar” dhe “Legjenda e futbollit shqiptar”.
Por në fakt, mbrëmë u akorduan edhe disa tituj të tjerë. Kështu me titullin “Pllakatë” janë vlerësuar edhe pesë figura të futbollit dhe një ndër to ka qenë edhe shkodrani Ferid Borshi. Krahas tij me këtë titull janë dekoruar edhe Kastriot Hysi, Ardian Popa, Dashnor Bita dhe Vladimir Skuro.
Vlerësimi për Borshin sigurisht që ka qenë i merituar dhe ndoshta edhe i vonuar. Megjithatë e rëndësishme është se dikush u kujtua për të. Në Pllakatën që i është dorëzuar shkruhet: “Mesfushori i njohur i Vllaznisë së viteve ’70-’80, ku ka arritur një seri suksesesh me këtë skuadër, duke u shpallur kampion kombëtar dhe fitues i Kupës së Shqipërisë.
Përfaqësues i një brezi futbollistësh të talentuar shkodranë. Mesfushor elegant dhe plot fantazi, me një kontribut të vlerësuar edhe në fushën e trainingut”.
© shkodrasport.com
