Pak muaj më parë, kur UEFA vendosi që të lëvronte për të gjitha Federatat njëkohësisht fondet që i përkitnin projektit “HatTrick”, FSHF u ngut të dilte e të sqaronte nëpërmjet zyrtarëve të saj se ato para nuk mund të shkonin në klubet që përballeshin me situatën e rëndë që kishte shkaktuar COVID-19.
Zyrtarët deklaruan publikisht se ato fonde ishin caktuar prej kohësh për stadiumin e Kukësit dhe do t’i lëvroheshin verilindorëve. Kanë kaluar të paktën 5 muaj që atëherë dhe në Kukës, ato fonde nuk po duken ende.
Denoncimin e ka bërë vetë presidenti i Kukësit dhe njëkohësisht kryetari i Bashkisë së qytetit, i cili në një intervistë për “Neës 24” theksoi se FSHF nuk po bën lëvrimin e fondeve dhe nuk po shlyen detyrimin që ka për të përfunduar impiantin sipas planit, duke e bërë të pamundur që skuadra të kthehet të luajë aty.
“Punimet në stadium nuk po ecin mirë, për shkak të pengesës së fondeve nga FSHF. Firma me kontratën e parë që ka pasur e ka përfunduar detyrimin. Kontratën e dytë nuk e ka filluar akoma dhe për shkak të financimit të bllokuar nga Federata dhe gjithashtu një pjesë e qeverisë se e dini që stadiumi është 50 me 50 me fondet e UEFA-s.
Fushën që ka mbetur pa u shtruar, fusha është bërë gati për tapet dhe e ka detyrim Federata, edhe stolat, edhe dritat janë detyrimi i Federatës. Këtu kemi ngel ur si problem i stadiumit.
Ka disa shtesa që ka bërë qeveria pas inspektimit të kryeministrit para disa muajsh, as shtesat nuk kanë filluar. Ne kishim planifikuar që ekipi të kthehej në stadium, por mungesa e këtyre financimeve ka bërë që të mos jemi në ritmin e duhur”, theksoi Gjici. /vipsport/
