Kampionati i futbollit amator 9X9 “FSHF Sunday League” në kryeqytet, i organizuar nga FSHF ka mbyllur fazën e rregullt dhe tashmë po bëhet gati të nisë me fazën play-off, ku do të jetë e angazhuar edhe skuadra e MFC Panthers Shkodër, që do të garojë për tre trofetë e këtij sezoni.
Kështu, ekipi shkodran ka njohur ditën e djeshme edhe kundërshtarin e tij në fazën “play-off” të FSHF Sunday League. Ata do të përballen me ekipin e Kastriotëve. Shkodranët do ta luajnë ndeshjen e parë në kryeqytet me datën 1-maj, pra të hënën e ardhshme, ku MFC Panthers Shkodër do të zhvillojë duelin e parë me ekipin e Kastriotëve.
Skuadra e MFC Panthers Shkodër e mbylli kampionatin në vendin e gjashtë në tabelën e klasifikimit në kuotën e 31-pikëve, ndërsa kundërshtari i tyre Kastriotët në grupin tjetër e ka mbyllur në vendin e tretë në kuotën e 36-pikëve. Qëllimi i tyre është që të garojnë deri në fund për tre trofetë e këtij sezoni, por mbetet për t’u parë se sa do ta realizojnë këtë objektiv që kanë vendosur.
Në fakt, MFC Panthers është i vetmi ekip shkodran që ka marrë pjesë në këtë kampionat dhe do të vijojë sërish me pretendime serioze. Për këtë arsye, drejtuesit kanë menduar të kenë në rradhët e tyre edhe ish-futbollistë të njohur.
Në përbërje të ekipit MFC Panthers Shkodra bëjnë pjesë emra të njohur të futbollit shkodran dhe atij shqiptar. Kështu, për të përmendur disa emra, të cilët kanë spikatur vitet e fundit në futbollin e kalçetos janë Fatjon Nutaj, Fatjon Marku, Besford Gjoklaj, Brendon Smajli, Ardit Mesi, Oltion Drabeja, Semir Gokaj, Admir Mehja, Valdano Nimani, Albert Mila dhe Redi Osmanaga.
Maringlen ZHIVANI
