Kampionati i futbollit të femrave është rikthyer ditën e sotme, teksa ka luajtur disa ndeshje të prapambetura, që ishin për llogari të një jave më parë. Kështu, ajo që ka spikatur më shumë në ditën e sotme, ka qenë përballja, Kinostudio-Murlani.
E zhvilluar ditën e sotme në qytetin e Tiranës, takimi në fjalë është fituar nga Murlani në shifrat 1-8. Murlani dominoi gjithë ndeshjen dhe për meritë të saj, shënoi edhe tre gola në pjesën e parë, me anë të futbollisteve, Vasa, Jaku dhe brazilianes Ferriera.
0-3 mbyllet pjesa e parë, rezultat ky që për skuadrën e Murlanit, tregon se sa autoritare ishte në fushën e lojës në pjesën e parë, gjë që e bën edhe në pjesën e dytë, teksa do të shënojë edhe pesë gola të tjerë. Minuta e 54-të ishte ajo kur Murlani do të shënonte edhe golin e katërt me anë të brazilianes Luiz.
Pësimi i golit huton vajzat e Kinostudios që sërish pas tre minutash pësojnë golin e pestë në portën e tyre, këtë radhë me autore Çerkinin. Futbollistet e Kinostudios reagojnë disi, duke ndërmarrë disa sulme në drejtim të portës së Murlanit, teksa në të 62-tën shënojnë me anë të futbollistes Koxha, që është edhe goli i nderit për ta.
Pas këtij goli, në lojë do të aktivizohet edhe brazilianja tjetër, Bispo, e cila arrin të shënojë edhe dy gola të tjerë, më konkretisht në minutën e 73-të dhe të 83-të. Pak para fundit të ndeshjes, do kishte vend edhe për golin e fundit të këtij takimi, që erdhi nga Vasa, që shënoi golin e tetë për Murlanin dhe të dytin personal në këtë ndeshje.
Përfundimisht, e gjithë ndeshja mbyllet me fitoren e merituar të Murlanit, me rezultatin 1-8. Kjo është fitorja e tetë e Murlanit të drejtuar nga trajneri Arben Parmeza, në 14-të javë kampionat, duke u renditur në vendin e pestë, me 25 pikë.
Maringlen ZHIVANI
