Nga Endri ÇINARI
Kategoria e Parë është duke qenë mjaft interesante këtë sezon. Gara në ligën e dytë për nga rëndësia në vend duket e egër për një ngjitje në Superiore sezonin e ardhshëm. Një grup prej 4-5 skuadrash pretendon ngjitjen dhe duket se deri në fund do kemi duele interesante.
Dhe në këtë ligë, me skuadrat kryesore protagonizmin e kanë marrë futbollistët shkodranë. Duke nisur nga kryesuesit e Bylisit, ku Aleksandër Trumçi është nga futbollistët kryesorë të ballshiotëve dhe shpesh e kemi parë në formacionin e javës në këtë sezon. Për të vijuar me AF Elbasanin e vendit të dytë. Dyshja Karakaçi-Hasani po vendosin shpesh fatet e skuadrës verdheblu.
Vora në vendin e tretë po ashtu po udhëhiqet nga dyshja shkodrane e sulmit, Rraboshta-Qardaku. Ku deri më tani dy sulmuesit kanë shënuar 14 gola në kampionat, ku 9 mbajnë firmën e Rraboshtes dhe 5 të Qardakut. Nuk ngel pas as Apolonia, ku një ndër liderët e skuadrës është Serjan Repaj.
Mbrojtësi shtalartë përveç se një titullar i padiskutueshëm i prapavijës, ka gjetur edhe 2 herë golin këtë edicion. Tek Flamurtari janë dy vëllezërit Denis dhe Paulo Pjeshka që janë protagonistë. Me të parin si kapiten dhe shënues 3 herë për vlonjatët këtë edicion. Pra nga 5 skuadrat kryesore të kësaj kategorie, janë futbollistët shkodranë ata që janë protagonistë. Dhe me patjetër disa prej tyre do i shohim në Superiore në sezonin që vjen.
