Barcelona është protagoniste në fushë dhe jashtë saj, më saktë edhe në jetën sociale. Klubi katalanas ka bërë me dije se ka investuar 6 milionë euro në programe asistence për fëmijët refugjatë në Itali, Greqi dhe Liban.
E ka bërë këtë me anë të Lilian Thuram, ish-mbrojtësit të Barcelonës, aktualisht ambasador i klubit. Ish-lojtari i Francës ka qenë javët e fundit në Liban për të vëzhguar njërin nga këta programe, të mbështetur nga “Fundació FC Barcelona”, i bazuar në mënyrë të veçantë në përdorimin e futbollit si një instrument për zhvillimin dhe integrimin e të rinjve emigrantë.
“Flasim shpesh për emigrimin, – ka thënë Thuram për “L’Equipe” – për fëmijë refugjatësh, për çështjen e dokumenteve të tyre, duke harruar që secili prej tyre dhe secili prej nesh ka nevojë të jetojë emocione pozitive. Emocione që jetohen nëpërmjet lojës.
Për këtë jam krenar që marr pjesë në këtë program dhe uroj që Barcelona do të shërbejë si shembull për klube të tjerë futbolli dhe për të tjerë persona”. Vipsport/
