Kamza po vijon përgatitjet për takimin e së dielës kundër Tiranës. Parashikohet të jetë një nga takimet ku vendosen fatet e sezonit, duke qenë se kemi të bëjmë me dy skuadra rivalësh në luftën e mbijetesës. Si kamzalinjtë, po ashtu edhe Tirana ndodhen në të njëjtat “halle”. Për këtë, të dy trajnerët do të synojnë që skuadrat të japin maksimumin.
Po kështu, edhe trajneri kamzali Ernest Gjoka, do të kërkojë që skuadra e tij të dalë fituese për një start të mbarë të këtij viti. Dita e djeshme për Gjokën ishte e veçantë, sepse përkonte me 49-vjetorin e lindjes.
Dhe në prononcimin e tij për “Panorama Sport” ai kërkon që dhurata më e bukur për të do të ishte një start i mbarë nga skuadra e tij, ndërsa fitorja me Tiranën do ta bënte të lumtur. Gjithashtu, ai foli dhe për fazën përgatitore dhe për nevojat e skuadrës në merkato.
Të dielën keni një ndeshje rivalësh, ç‘mendim keni për këtë takim ndaj Tiranës?
Sigurisht që është një ndeshje e vështirë. Është një ndeshje me një kundërshtar direkt. Jemi në pozita të vështira të renditjes, kështu që vetë ky takim rivalësh do të ketë përqendrimin maksimal. Ne po përgatitemi seriozisht. E dimë që kemi përballë një skuadër, emri i së cilës vërtet është i madh, por që kemi të njëjtat probleme. Do të mundohemi të bëjmë gjithçka mirë.
Sa është ambientuar tashmë trajneri Gjoka, që nga ardhja e tij?
Nuk është problem për përshtatjen, sepse unë kam ardhur në një klub që kam qenë dhe i njoh specifikat e tij. Akoma më të lehtë ma kanë bërë dhe vetë lojtarët. Kjo ngaqë kam shumë djem që më njohin mirë, duke qenë se kemi vite që bashkëpunojmë. Kështu që them se jemi përshtatur goxha mirë.
Sa ka ndikuar kjo fazë përgatitore në drejtim të përforcimit të skuadrës?
Ka qenë një fazë përgatitore e suksesshme, duke pasur parasysh ato që ne kemi kërkuar. Themi se ka ndikuar për mirë, tashmë presim që skuadra të japë maksimumin.
Cili është pengu juaj nga merkato, dhe a priten të tjera afrime?
Ne e kemi potencialin edhe me kaq sa është bërë. Sigurisht, që mund të na duhej edhe ndonjë mbrojtës tjetër, duke qenë se kampionati është shumë i gjatë. Mund të kemi dëmtime, mund të kemi kartonë. Po kështu problem është numri i të huajve, të cilët i kemi me shumicë. Por, kaq ishin mundësitë tona. Kjo na bën të mundohemi të luajmë me këta lojtarë.
Meqenëse ju keni edhe ditëlindjen, çfarë dhurate prisni në këtë përvjetor të 49-të?
Zakonisht në këtë punë që ne bëjmë nuk mund të themi se presim të na bëjnë dhurata. Është një punë që nuk mund të parashikosh asnjë dhuratë. Sigurisht që do të ndihesha më mirë sikur ky 49 vjetor të niste me një fitore, pra një start i mirë për Kamzën. Të gjithë të jemi bashkë për hir të Kamzës, qytetit. Kjo sigurisht do të ishte dhurata ime.
Keni ndonjë koment lidhur me reagimin e kryebashkiakut Mziu?
Mua më vjen keq për këtë situatë, pasi nuk e di sesi janë marrëdhëniet e tyre. Unë e kam thënë dhe vazhdoj të këmbëngul, që në qoftë se të gjitha hallkat do të bashkohen për hir të qytetit, të skuadrës, për hir të flamurit, ia dalim.
Çdo skuadër ka një flamur, por edhe për anën profesionale dhe atë morale të çdo njeriu. Në qoftë se do të bashkohemi të gjithë, të luftojmë së bashku, mendoj se Kamza do të shpëtojë, e nëse do të kemi të tilla probleme, atëherë mendoj se ndikimi do të jetë direkt tek ana psikologjike e lojtarëve, që nuk do jenë të qetë.
Do të shohin dy titullarët kryesorë që nuk shkojnë mirë me njëri-tjetrin. Uroj dhe shpresoj që dikush të bëjë një hap mbrapa, për hir të shumë gjërave, pasi në fund të fundit ky nuk është problem privat, por një çështje shumë më madhore. Është një qytet që duhet respektuar dhe janë të gjithë aq të aftë sa ta kuptojnë këtë gjë.
