Ndonëse duhet edhe një muaj e gjysëm që të nisë zyrtarisht merkatoja e dimrit, tek Vllaznia ka nisur puna për gjetjen e ndonjë lojtari cilësor. Dhe nëse deri më sot mendohej që kuqeblutë do të kërkonin përforcim për në sulm, kjo nuk është e saktë. Më shumë e domosdoshme për stafin aktual është gjetja e një qendërmbrojtësi.
Këtë e ka pranuar vetë trajneri Ernest Gjoka i cili ka qenë i ftuar në emisionin “Star Sport” dhe në lidhje me këtë çështje ka deklaruar: “Jam shumë i shqetësuar për merkaton e janarit sepse në të nuk është se gjen gjithçka. Ajo e verës është më e mirë në këtë drejtim sepse të jep më shumë mundësi megjithatë ne po punojmë në këtë drejtim. Gjithsesi ne po shohim mundësinë që të bëjmë ndonjë përforcim sidomos në repartin e mbrojtjes. Unë Orelesin e njoh shumë mirë sepse kam dashur ta marrë tek Flamurtari që në vitin 2013 por nuk ma dha Takaj por ai është mesfushor dhe madje mendoj se është një nga mesfushorët më të mirë nga të huajt që ka ardhur në vendin tonë. Atë vend që po bën tani, atë të qendërmbrojtësit, besoj se është duke e bërë i sforcuar dhe për interesa të skuadrës”.
© shkodrasport.com
