Humbja e Kamzës ndaj Partizanit, sipas Ernest Gjokës ishte më shumë reflektim i problemeve jashtë fushe. Në një prononcim për ‘Supersport’ ai ka kërkuar që t’i jepet zgjidhje këtij problemi duke qenë se nuk mund të vazhdohet në këtë mënyrë.
“Njerëzit që e drejtojnë duhet të zgjidhin këtë situatë pasi ne nuk i zgjidhim dot në fushë. Nuk është çështje ultimatumi por duhet zgjidhur pasi njerëzit kanë nevojë të mbajnë familjet. Në këtë moment jemi në këtë situatë pasi drejtuesit kanë prishur marrëdhënien dhe kjo ndikon direkt te skuadra.
Uroj të zgjidhen gjërat që skuadra të jetë e qetë. Mundësitë e mia janë të përgatis skuadrën për të dalë në fushë. Kur e kam skuadrën të qetë nga ana psikologjike, gjërat shkojnë mirë por kur rëndohen s’kam çfarë bëj. Jemi në gjendje kritike.
Jam i kënaqur me të gjithë që u përgjigjën dhe u munduan të japin gjithçka. Hynë në fushë dhe dhanë maksimumin. Bënë mirë apo keq, do ta vlerësoj.
Mendoj se do t’i jap pak kohë presidentit dhe nëse nuk e qetëson skuadrën dhe në rast se nuk ndodh, as unë dhe as kushdo nuk e mban dot skuadrën. Normalisht që unë i pari do të rishikoj pozicionin tim. Kur sheh lojtarët që vijnë në stërvitje vetëm fizikisht, për çfarë duhen?”, tha Gjoka. /VipSport/
