Vllaznia ka bërë atë që duhej të bënte në fushën e saj, edhe pse përballë kishte Skënderbeun kryesues. Ka shënuar dy herë, por në fund është rrezikuar shumë nga korçarët.
Trajneri i Vllaznisë, Ernest Gjoka, për fitoren me Skënderbeun dhe pjesën e mbetur të kampionatit është shprehur:
“Skuadra dha gjithçka sot dhe në futboll shpesh, kur cilësisë i shtohet edhe grinta dhe dëshira, bën që të shkosh te rezultati. Nuk ishte punë ngërçi psikologjik.
Skënderbeu na barazoi, por më pas gjetëm forca dhe arritëm të kalonim përsëri në avantazh. Në pjesën e dytë e kontrolluam lojën më mirë.
Num dua të veçoj individë të caktuar, por komplimentoj gjithë skuadrën. Lika bëri atë që duhet, duke shërbyer, ashtu si dhe Çinari, por e ritheksoj se ishte skuadra që bëri lojën.
Ishte fat shumë i madh që nuk pësuam gol në fundin e ndeshjes, në atë rast të Skënderbeut. Një sakrificë shumë e madhe e Berishës dhe Orelesit.
Do të më vinte shumë keq, nëse do të barazoheshim, pasi po shkonte gjithçka ashtu siç donim në këtë ndeshje. Edhe fati këtë radhë ishte me Vllazninë.
Qetësi nuk do të kemki kurrë deri në fund të kampionatit. Pasi edhe rivali fitoi. Lufta do të jetë më e egër dhe në 9 javët e ardhshme do të jemi të stresuar, pasi duhet të sigurojmë mbijetesën.
Tifozëria është oksigjen, një patericë e fortë për skuadrën në këto momente. Ata janë pak skeptikë për skuadrën në këto momente, por shpresojmë që të shtohen në ndeshjet e ardhshme.
Edhe puna e orarit duhet parë, pasi tani fillon vapa dhe do të jetë më e vështirë të luhet në mesditë”. / Vipsport/
