Trajneri i Lushnjës, Ilir Gjyla, pas humbjes së thellë të skuadrës së tij, është shprehur mjaft kritik për lojtarët e tij, duke iu referuar gabimeve të shumta në mbrojtje.
Ai ka theksuar se Lushnja ka disa lojtarë jabanxhinj që nuk e justifikojnë besimin dhe nëse dikush ka në mendje që tani çfarë do të bëjë sezonin e ri, më mirë të ikë që në këtë moment:
“Ishte maksimumi i gabimeve që mund të bënim në një ndeshje. Golat e Vllaznisë erdhën si rezultat i gabimeve tona, të mbrojtjes dhe portierit.
Na sulmuan në qendër, ku kishim Ruçon të natyralizuar si mbrojtës qendre, pasi nuk kishim tjetër lojtar.
Por kjo nuk do të thotë se duhet të gabosh, nëse je i natyralizuar në një rol. Patëm edhe raste, por që nuk mundëm t’i realizonim.
E kam marrë skuadrën për ta rinovuar, për këtë kam ardhur, por nuk do të thotë se duhet të turpërohemi.
Kemi në skuadër futbollistë që nuk e justifikojnë fanellën. Duhet të kenë pak më shumë dinjitet, sepse paguhen nga taksapaguesit lushnjarë.
E kam fjalën për lojtarë nga qytetet e tjera. U thashë lojtarëve në pushim: nuk ju vjen turp për djersën tuaj! Sa herë që Vllaznia vinte në portën tonë, na shënonte.
Të gjithë e dimë se do të dalim nga kategoria, por nuk mund të shitemi kaq lirë.
Nëse ndonjë futbollist e ka në mendje që tani për të ikur, më mirë ta bëjë dhe të mos na shqetësojë, le ta marrin rrogën”, – theksoi trajneri Gjyla pas ndeshjes. / Vipsport/
