Vllaznia arriti një fitore shumë të rëndësishme në javën e 11-të të Superiores. Kuqeblutë mundën me rezultatin 0-1 në transfertë skuadrën e Kukësit. 3 pikë që e dërgojnë ekipin e Joses vetëm 3 pas Tiranës në kuotën e 18 pikëve. E ndërsa bardheblutë kryesojnë tashmë me 21 pikë.
Ndeshja e luajtur dje në Kukës patjetër sjell edhe njëfarë qetësie në kampin shkodran. Ku realisht situata nuk ka qenë edhe aq e qetë, por tashmë gjithçka duket në rrugën e duhur. Heroi i takimit përballë verlindorëve ishte Esin Hakaj. Mbrojtësi i majtë që vendosi gjithçka md golin e tij.
Ishte një aksion personal i Hakajt i nisur nga krahu i majtë i finalizuar me një goditje spekakolare nga hyrja e zonës. E për më tepër për 26-vjeçarin goli erdhi nga këmba e tij e djathtë, që nuk e ka të preferuarën. Por ka një fakt interesant për këtë gol të numrit 23, që jo vetëm ishte goli i tij i parë këtë sezon, por edhe i pari nga një shkodran me Vllazninë këtë edicion.
Asnjë futbollist shkodran nuk kishte arritur të shënonte deri në këto momente të kampionatit me fanellën kuqeblu. Hakaj bëhet lojtari i parë nga Shkodra që gjen rrjetën në këtë sezon me kuqeblutë.
Një statistikë ndoshta e çuditshme pasi gjithmonë Vllaznia është udhëhequr nga golat e shkodranëve, por duket se tashmë sporti ecën me hapa të tjerë nga e shkuara.
Endri ÇINARI
