Nga Endri ÇINARI
Vllaznia arriti një fitore plot vështirësi në javën e fundit të kampionatit. Shkodranët triumfuan në shifrat 0-2 në Korçë përballë Skënderbeut. Një fitore që i jep “frymëmarrje” ekipit të Memellit, pas një periudhe plot ulje dhe ngritje. Dueli ndaj korçarëve u vendos nga një autogol dhe një gol i Delajt.
Për t’u ndalur pikërisht tek sulmuesi shkodran, ky ishte goli i tij i parë si profesionist në kampionat. Patjetër një datë që do mbahet mend gjatë nga 20-vjeçari dhe një kënaqësi personale. Rrjeta e parë në kampionat, për një prej lojtarëve që cilësohet si e ardhmja e kuqebluve dhe ndaj të cilit ndoshta duhet besuar më shumë.
Por ky gol vlen jo vetëm për Delajn, por tashmë numëri 13-të është sulmuesi i vetëm pas Balajt që ka gjetur golin këtë sezon. Futbollistët e tjerë të këtij reparti deri më tani kanë pasur një “ngërç” përsa i përket dërgimit të topit në rrjetë. Ku pavarësisht performancave pozitive, ende nuk e kanë bërë “sefte” këtë edicion.
Një gol i tillë mund ta “avantazhojë” Delajn për javët në vijim. Ku besimi tek ky lojtar patjetër që është rritur tek stafi teknik. Që tashmë mund të kenë edhe një alternativë më shumë përsa i përket repartit sulmues. Repart të cilin e ka mbajtur i vetëm “mbi shpatulla” deri më tani, Bekim Balaj.
