Vllaznia ka nisur dje përgatitjet për takimin me rivalen historike, skuadrën e Dinamos. Por, këtë herë të dyja ekipet janë në Kategorinë e Parë dhe nuk luftojnë për titullin kampion, por vetëm për t’u ngjitur në elitë.
Kjo seancë e parë stërvitore ka nisur mes optimizmit nga ana e kuqebluve, të cilët duket se i janë afruar ndjeshëm objektivit që kanë për të kaluar në Superiore. Këtë optimizëm e ka shtuar më tepër edhe rezultati i përballjes së të dielës mes Besëlidhjes e Erzenit, ku skuadra mike është frenuar në Lezhë.
Një nga lojtarët që duket se e ka shijuar më shumë fitoren e skuadrës shkodrane në atë sfidë tejet të vështirë në Peshkopi është edhe vlonjati i Vllaznisë, Valdo Zeqja. Ky i fundit shënoi golin e vetëm dhe të fitores për kuqeblutë në transfertën e Dibrës.
Ndeshjen e fundit ndaj Korabit fitorja erdhi nga ju, ku keni shënuar golin e fitores, i cili me sa duket ishte edhe goli i parë i juaji?
Në fakt, ky është goli im i parë në Shqipëri. Kam luajtur edhe në Kosovë dhe kam shënuar edhe aty një gol. Megjithatë, jam i lumtur që fituam një ndeshje shumë të fortë sepse Korabi është një nga skuadrat që na ka hapur shumë punë. Një gëzim më vete, pasi ishte gol me vlera 3-pikësh.
Me këtë fitore tuajën dhe me barazimin e Erzenit rruga drejt Superiores është e sigurt?
Mendoj se jemi në rrugë të mbarë. Megjithatë, është shpejt që të bësh llogari. Ne duhet që ta sigurojmë ngjitjen matematikisht shumë shpejt. Prandaj duhet që të fitojmë të paktën të gjitha ndeshjet e pjesës së parë të fazës së tretë. Ndoshta aty do të bëjmë llogaritë, pasi formula e garës si të thuash ka rifutur në lojë edhe ekipet e tjera. Por, mendoj se jemi në rrugën e duhur.
Si është atmosfera në Shkodër?
Në fakt, ndonëse skuadra është drejt ngjitjes dhe rikthimit në elitë, ende nuk e besojnë se luajmë në Kategorinë e Parë. Por, është një qytet me shumë kulturë dhe jeton me futbollin. Në këtë aspekt jam shumë komod.
Kategoria e Parë ka vështirësitë e veta, si ju është dukur deri tani?
Me të vërtetë ka shumë vështirësi. Vllaznia ka në gjirin e saj shumë lojtarë që luajnë taktikisht, ndërsa ka disa fusha apo skuadra që nuk të lënë të luash. Unë e njoh këtë kategori sepse kam luajtur edhe më parë. Megjithatë, fakti që ne jemi në krye me meritë tregon se kemi punuar mirë.
Zeqaj, një eksperiencë e re te Vllaznia, lë Superioren për të kontribuar në rikthimin e shkodranëve në elitë?
Është e vërtetë, në fakt unë kam luajtur edhe më parë në Superiore. Jam në kulmin e karrierës dhe duke qenë se kisha punuar me trajnerin Hasan Lika në Gjirokastër, mendova që të vij te Vllaznia. Pastaj dihet se kush janë shkodranët në futbollin shqiptar. Kam bërë zgjedhjen e duhur.
Ia vlen që të luash për Vllazninë kudo që të jetë. Shkodra është djepi i futbollit shqiptar, kam ardhur me synimin që të luaj dhe të jap kontributin tim maksimal që skuadra të rikthehet në elitën e futbollit. Momentalisht asnjë nuk e do Vllazninë në këtë kategori, por ne po punojmë të gjithë që ta rikthejmë aty ku e ka vendin.
